«Ավելացրած արժեքի հարկի մասին» օրենքում փոփոխություններ և լրացումներ կատարելու մասին օրենքի նախագծերի փաթեթն առաջին ընթերցմամբ ընդունելու մասին հարցի քննարկման ժամանակ ելույթով հանդես եկավ նաև ՀԱԿ խմբակցության պատգամավոր Հրանտ Բագրատյանը: Նա նախ նշեց, որ ԵՏՄ անդամակցությունը, ինչպես նաև Սահմանադրությունն այսօր արդեն իրողություն է: «Այս բանաձևը, որին ես կողմ կքվեարկեմ իր մեջ բավական թերություններ ունի: Այն ելնում է հետևյալ տրամաբանությունից, որ եթե մի մեքենա ես բերում, այդ մեքենայի վրա Ավելացրած արժեքի հարկ չեն գանձում, իսկ եթե երե՞քը, չո՞րսը, հի՞նգն են բերում»,-ասաց նա:
Նա նշեց, որ այսօր ինքն արդեն չի միանա օրենքի նախագծին, թեև կողմ կքվեարկի: «Եթե խոսքը վերաբերում է անձնական սպառման համար ձեռքբերված մեքենաներին, ապա գոյություն ունեն ներմուծման ապրանքային քանակություն, որը դուք պետք է գրեիք ու լավ կլիներ ինձ էլ հրավիրեիք: Եթե մենք գրում ենք մի մեքենային ենք տալիս, տակը մեկ տողով պետք է գրեինք մեկ մեքենան ճանաչում ենք ապրանքային քանակություն»,-ասաց նա և հավելեց. «Ես հիմա կողմ կքվեարկեմ, որ ստոպ չտամ այս ապօրինությունների լուծմանը»:
Ինչ վերաբերում է հարցին, թե ինչպես պետք է վարվել այն գումարների հետ, որն արդեն գանձվել է, Հրանտ Բագրատյանն ասաց.«Ես մի տարբերակ ունեմ, եթե բյուջեն փող չունի, ապա ձևակերպեք պետական պարտք և մարեք գոնե առաջիկա հինգ-տասը տարիներին»:
Մանրամասները՝ տեսանյութում:
