Լոռու մարզի ընդհանուր իրավասության դատարանում Մարինե Մելքոնյանի նախագահությամբ ավարտվել է Անահիտ Սարդարյանի գործի դատավարությունը:
21-ամյա վանաձորցի Անահիտ Սարդարյանը մեղավոր է ճանաչվել այն բանի համար, որ 2012 թվականի սեպտեմբերի կեսերին սեռական շահագործման նպատակով անչափահաս՝ 1995 թվականի փետրվարի 2-ին ծնված Ս.-ին հանձնել է Վաչագան Մարտիրոսյանին, այդ «նվերի» համար նրանից պահանջել ու ստացել է 20 հազար դրամ:
Վաչագանը, «մատչելի գնով ձեռք բերելով» Լոռու մարզի գյուղերից մեկի այդ անչափահաս բնակչուհուն՝ որոշակի զվարճանքների համար, նախ նրան տարել է Վանաձորում ապրող իր պապիկի տուն, ապա տեղափոխել Լոռու մարզի Գուգարք գյուղի Էներգետիկների փողոցի տնակներից մեկը, որտեղ սեռական հարաբերություններ է ունեցել 17-ամյա Ս.-ի հետ:
Ըստ մեղադրանքի՝ այսպիսով, անչափահաս՝ 18-ը չբոլորած աղջիկը ենթարկվել է սեռական շահագործման:
Օ, բարքեր. եթե Աղայանի հայտնի հեքիաթում Անահիտը Վաչագանին սառը ջուր էր տալիս և արհեստների կարևորության մասին իմաստուն խրատներ, ապա 21-րդ դարի 21-ամյա Անահիտը իր ժամանակակից Վաչագանին գումարով անչափահաս աղջիկ է տվել և եռօրյա զվարճանքի՝ «վճարված հնարավորություն»:
Քանի որ վերջին՝ ժամանակակից «տարբերակում» հեքիաթային ոչինչ չկա, միայն քրեական երանգավորումն է գերիշխում, անչափահասին սեռական շահագործման հանձնած Անահիտ Սարդարյանը կալանքի տակ է առնվել 2012 թվականի հոկտեմբերի 30-ին:
Նրան մեղադրանք է առաջադրվել ՀՀ քրեական օրենսգրքի 132.2 հոդվածի 1-ին մասով: Գործն ընդհանուր իրավասության դատարան է ուղարկվել 2013 թվականի ապրիլի 18-ին:
Ընդհանուր իրավասության դատարանում Անահիտ Սարդարյանն իրեն լիովին մեղավոր է ճանաչել, միջնորդել, որ իր գործը քննվի արագացված ընթացակարգով:
Դատարանը հաշվի է առել, որ ամբաստանյալի մոտ հայտնաբերվել է 35-36 շաբաթական հղիություն: Հաշվի են առնվել նաև կատարված արարքի բնույթն ու հասարակական վտանգավորության աստիճանը, հանցագործության տարածվածությունը և այլ հանգամանքներ: Միգուցե Անահիտն էլ է անչափահաս տարիքում սայթաքել, և այսօրվա արարքի արմատները պետք է որոնել նրա անցյալում:
Ինչքան էլ Անահիտը թեթևամտորեն վերաբերվեր իր արարքին, նրա կատարածը համարվում է ծանր հանցագործություն:
Լոռու մարզի ընդհանուր իրավասության դատարանը 2013 թվականի մայիսի 18-ի դատավճռով Անահիտ Սարդարյանին դատապարտել է 7 տարի ազատազրկման: Պատժի սկիզբը՝ 2012 թվականի հոկտեմբերի 30-ից:
* Լուսանկարում պատկերված են նյութի հետ առնչություն չունեցող անձինք:
