«Քինգ դե Լյուքս» ընկերության շուրջ Գագիկ Ծառուկյանի ու նրա սանիկ Արթուր Հարությունյանի՝ Պալաչի կրքերը չեն հանդարտվում: Մեզ հասած տեղեկություններով՝ բանկերին «Քինգ դե Լյուքս» ընկերության պարտքը կազմում է 4.5 մլն ԱՄՆ դոլար, իսկ Ծառուկյանը չի ուզում այդքան գումար տալ՝ թերևս մտածելով, որ ինքը երթուղու միակ հնարավոր գնորդն է, որևէ մեկն այլևս չի հավակնի այդ երթուղուն ու կարելի է գին գցել:
Հիշեցնենք, որ անցյալ տարվա ամռանը «Առէքսիմբանկը» դիմեց դատարան՝ ընկերության սնանկության հարցով, ու «Քինգ դե Լյուքսը» սնանկ ճանաչվեց: Դրանից առաջ «Քինգ դե Լյուքսի» տերը պայքարում էր բիզնեսը փրկելու համար ու Ծառուկյանին մեղադրում բարեգործական երթուղով իր բիզնեսին «խփելու» մեջ: 2012-ին Արթուր Հարությունյանը դիմել էր նաև Սերժ Սարգսյանին, վարչապետին, Տնտեսական մրցակցության պաշտպանության պետական հանձնաժողովին` պահանջելով պարզել, թե ինչու է Ծառուկյանը միայն իր ընկերության մրցույթով շահած երթուղիների գծերին զուգահեռ բարեգործական երթուղի բացել: Արթուր Հարությունյանն անգամ անդամագրվել էր ՀՀԿ-ին ու դատի տվել Ծառուկյանին: Սակայն դատական գործընթացի կեսից Հարությունյանը հրաժարվեց Ծառուկյանի դեմ պայքարից՝ թերևս այն համարելով անիմաստ:
Արդեն մի քանի օր է՝ «Քինգ դե Լյուքս» ընկերությունը չի սպասարկում Երևան-Չարենցավան և Երևան-Աբովյան երթուղիները, քանի որ բանկն առգրավել է սնանկ ճանաչված ընկերության ավտոբուսները: Ի վերջո՝ կարելի է ասել, որ Արթուր Հարությունյանը դարձավ Ծառուկյանի դեմպինգի զոհը: Տեղեկություն կա, որ երբ կիզակետին է հասել Հարությունյան-Ծառուկյան հակամարտությունը, Ծառուկյանը հավելյալ ավտոբուսներ է մտցրել երթուղի:
Մամուլում գրվել էր, որ Ծառուկյանն անգամ պայմանավորվածություն է ունեցել «Պրոմեթեյ» բանկի հետ, որ գնելու է «Քինգ դե Լյուքսի» գույքը, սակայն հաշվարկից հետո Ծառուկյանը հրաժարվել է գործարքից: Իսկ օրեր առաջ Ծառուկյանի խոսնակ Իվետա Տոնոյանը նույն լրատվամիջոցի հետ զրույցում չէր բացառել, որ Գագիկ Ծառուկյանը ցանկություն կհայտնի գնել «Քինգ դե Լյուքսը»:
Գագիկ Ծառուկյանի մամուլի խոսնակ Իվետա Տոնոյանը, ով նաև Ծառուկյանի բարեգործական ավտոբուսների երթուղին շահագործող «Գագիկ Ծառուկյան հիմնադրամի» տնօրենն է, մեր հարցին ի պատասխան ասաց. «Ես Գագիկ Ծառուկյանի տեսակետն եմ փոխանցում. այս պահի դրությամբ Գագիկ Ծառուկյանը «Քինգ դե Լյուքս» ընկերությունը ձեռք բերելու ցանկություն չունի»: Մեր հստակեցմանը՝ եթե այս պահի դրությամբ չունի, հետո կարո՞ղ է ունենալ, պատասխանեց. «Ես կանխատեսումներով չեմ կարող զբաղվել: Դուք ճիշտ էս պահի դրությամբ եք հարցն ուղղում, ես էլ էս պահի դրությամբ պատասխանում եմ, որ այս պահին Գագիկ Ծառուկյանը ընկերությունը գնելու ցանկություն չունի»:
Իվետա Տոնոյանը հերքեց նաև, որ Ծառուկյանի կողմից դեմպինգ է եղել և «Քինգ դե Լյուքսը» միտումնավոր սնանկացման է տարվել, որ Արթուր Հարությունյանի ընկերությունը հնարավորինս էժան գնով վերցնի ձեռքից: «Ես չգիտեմ՝ ձեր նշած ընկերության ավտոբուսները քանի տարի է՝ աշխատում են, 2 կամ 3 մաքսիմում, իսկ «Ծառուկյան բարեգործական հիմնադրամի» ավտոբուսները այդ երթուղիներում գործում են 10 տարուց ավելի: Որևէ անձի գործունեությամբ պայմանավորված չի եղել բարեգործական ավտոբուսների գործունեությունը»,- հավաստիացրեց բարեգործական հիմնադրամի նախագահը:
Փաստ է նաև, որ այս ամենի արդյունքում տուժում են Չարենցավանի ու Աբովյանի բնակիչները, ովքեր արդեն տևական ժամանակ Երևան հասնելու խնդիր ունեն՝ կապված տրանսպորտի բացակայության հետ: Քաղաքացիները ստիպված տաքսիներից են օգտվում կամ ժամերով սպասում Գագիկ Ծառուկյանի բարեգործական կոչվող ՊԱԶ-երին: