Ուկրաինայի մայրաքաղաք Կիևում արգելել են մայիսի 25-ին նախատեսված գեյ-շքերթը: Ինչպես հաղորդում է Interfax-ը, համանման որոշում է կայացրել քաղաքի շրջանային վարչական դատարանը:
Դատարանն ընդունել է քաղաքային իշխանությունների միջնորդությունը, որոնք խնդրել են արգելել այդ օրը նախատեսված ցանկացած միջոցառում, բացի Քաղաքի օրվան նվիրված տոնակատարություններից:
Հաղորդվում է, որ դատարանի որոշումը կբողոքարկվի:
Մայիսի 25-ին նախատեսված ակցիային մասնակցելու էր շուրջ 500 մարդ: Դրա հետ մեկտեղ քաղաքային վարչակազմը ստացել է տասնյակ հայտեր ընդդեմ գեյ-շքերթ անցկացնելուն: Քաղաքային իշխանություններն իրենց հերթին մայիսի 25-ին նախատեսում են անցկացնել մի շարք միջոցառումներ՝ կապված Քաղաքի օրվա հետ:
Բարձրաստիճան պաշտոնյաներն այս կապակցությամբ դիմել են գեյ-շքերթի կազմակերպիչներին՝ առաջարկելով միջոցառումը տեղափոխել մեկ այլ օր, սակայն վերջիններս հրաժարվել են: Արդյունքում հարցը լուծվել է դատարանի միջոցով:
