Մեծ Բրիտանիայի մայրաքաղաք Լոնդոնի քաղաքապետ Բորիս Ջոնսոնն այսօր հայտարարել է, որ չորեքշաբթի մայրաքաղաքում ծայրահեղականների կողմից բրիտանացի զինվորականի սպանությունը կապված չէ կրոնի և իսլամական երկրներում բրիտանական արտաքին քաղաքականության հետ: Այս մասին հաղորդում է ITAR-TASS-ը:
«Լիովին սխալ կլինի այս հանցագործությունը իսլամի հետ կապելը: Սակայն սխալ կլինի փորձել կապել դա Մեծ Բրիտանիայի արտաքին քաղաքականության կամ բրիտանացի զինծառայողների գործողությունների հանդեպ արձագանքի հետ, որոնք իրենց կյանքն են վտանգում արտասահմանում հանուն ազատության: Պատասխանատվությունն ամբողջությամբ դրված է այն մարդկանց վրա, որոնք արել են դա՝ հիմնվելով իրենց կեղծ աշխարհընկալման վրա»,- ասել է Լոնդոնի քաղաքապետը Sky News-ին տված հարցազրույցի ժամանակ:
Ականատեսների խոսքերով՝ սպանությունն իրականացրել են երկու սևամորթ երիտասարդներ՝ զինված ատրճանակով և դանակներով: Գազանաբար սպանելով զինվորին՝ ծայրահեղականները անցորդներից մեկից պահանջել են իրենց հայտարարությունը նկարահանել բջջային հեռախոսի տեսախցիկով: Ականատեսի արած ձայնագրության վրա հարձակվողներից մեկը բղավում է՝ «Մենք երդվում ենք ամենակարող Ալլահին, որ երբեք չենք դադարի կռվել ձեզ հետ»: Կասկածյալն իր արարքը մեկնաբանում է նրանով, որ վրեժ է լուծում նրանցից, ովքեր պատերազմում են մուսուլմանների դեմ:
