Գերմանիայի Մյոնխելգլադբախ քաղաքում անծանոթը հարձակվել է ոսկերչի մեքենայի վրա և գողացել մի քանի միլիոն եվրո արժողությամբ թանկարժեք քարերով նրա պայուսակը: Այս մասին RIA Novosti-ին հեռախոսով հայտնել է քաղաքային ոստիկանության ներկայացուցիչ Փիթեր Շպիրցը:
Նրա խոսքերով՝ դեպքը տեղի է ունեցել երեկ երեկոյան, երբ ոսկերիչը մեքենայով կանգնել է լուսացույցի կարմիր լույսի տակ:
«Հանցագործը կոտրել է մեքենայի ապակին, բալոնից գազ արձակել, հափշտակել ուղևորի համար նախատեսված առջևի նստարանին դրված պայուսակն ու փախել: Տուժածը կարողացել է հաղորդել միայն այն, որ հանցագործի հագին եղել է կաշվե բաճկոն և մոտոցիկլավարի սաղավարտ»,- ասել է Շպիրցը: Նրա խոսքերով՝ հայտնի չէ, հանցագործը մոտոցիկլավա՞ր է եղել, թե՞ սաղավարտը կիրառել է դիմակավորման համար:
Գործակալության զրուցակցի խոսքերով՝ պայուսակում թանկարժեք քարեր են գտնվել: Գողոնի հստակ արժեքը նշել նա դժվարացել է՝ ասելով, որ խոսքը մի քանի միլիոն եվրոյի մասին է:
