Ապրիլի 17-ին կայանալու է Լոռու մարզի Սպիտակ քաղաքի քաղաքապետի ընտրությունները: Այս պահին առաջադրվելու ցանկություն է հայտնել միայն ՀՀԿ-ական քաղաքապետ Գագիկ Սահակյանը, ով, ինչպես հայտնի է, ԱԺ պետաիրավական հարցերի հանձնաժողովի նախագահ Հովհաննես Սահակյանի ազգականն է:
Ինքը՝ Գագիկ Սահակյանը, չի ընդունում, որ Հովհաննես Սահակյանի աջակցությամբ է դարձել քաղաքապետ:
Նա նաև վստահեցնում է, որ իր հույսն ընտրություններում Հովհաննես Սահակյանի աջակցության վրա չէ: «Իմ հույսը ժողովրդի աջակցության վրա է: Հովհաննես Սահակյանը ժողովրդի մի մասնիկն է, մի ընտրող է»:
Սպիտակի քաղաքապետը չի բացառում, որ հնարավոր է առանց մրցակցի մասնակցի ընտրություններին. «Որևէ բան բացառված չէ մեր կյանքում»: Հիշեցնենք, որ Սպիտակի քաղաքապետի ընտրություններում առաջադրվելու ցանկություն էր հայտնել ակտիվիստ Վաղինակ Շուշանյանը, որը, սակայն, հետո հրաժարվեց այդ մտքից:
Մեր հարցին, թե ի՞նչ է ուզում անել, որ իր ղեկավարման տարիների ընթացքում չի արել, Սահակյանն ասաց. «Որովհետև իմ քաղաքի մասին շատ եմ մտածում, որովհետև իմ քաղաքացուն շատ եմ սիրում»: Քաղաքացիներն իրեն սիրում են, թե ոչ, «կերևա ընտրություններից հետո… իհարկե սիրում են»:
ՀՀԿ-ական քաղաքապետն ուզում է կրկին ընտրվել, որովհետև «ասելիք ունի, անելիք ունի, կարողություն ունի»: «Եվ ժողովրդի հետ համատեղ էդ կարողություններն օգտագործում ենք»,- ասաց Սահակյանը:
