«Ոտքի՛, Հայաստան»-ը «Նոր Հայաստան» հանրային փրկության ճակատի անդամ է և սատարում է նրա գործունեությանը: «Ոտքի՛, Հայաստան» նախաձեռնության անդամ Դավիթ Հովհաննիսյանն «Առաջին լրատվական»-ի հետ զրույցում տեղեկացրեց, որ համագործակցությունը դեռևս շարունակվում է. «Բայց մենք կողմնակից ենք ավելի կոնկրետ քայլերի՝ քաղաքացիական անհնազանդության միջոցով հասնել նախագահական արտահերթ ընտրությունների, և եթե տեսնենք, որ դրան միտված քայլեր չեն արվում, միգուցե այլևս չհամագործակցենք»:
Մեր զրուցակցի կարծիքով՝ 2017-ի ընտրություններին գնալը ժողովրդին ինչ-որ բան չի տալու, դա խաբեություն է. «Ցանկացած ուժ դրանով խաղում է Սերժ Սարգսյանի դաշտում և ևս մեկ անգամ հիասթափեցնելու է ժողովրդին, այսօր ՀՀ-ում միայն արտահերթ ընտրություններով ինչ-որ բան կփոխվի»:
Դավիթ Հովհաննիսյանի հավաստմամբ՝ 2017-ի ընտրություններին նախապատրաստվող ուժերի նկատմամբ «Ոտքի՛, Հայաստան» նախաձեռնության խիստ դիրքորոշումը և բնորոշումները «Նոր Հայաստան»-ի հետ համաձայնեցված չեն: «Սակայն ոչ ոք դեմ չի արտահայտվել»,- նշեց Դ. Հովհաննիսյանը:
Մանրամասները՝ տեսանյութում:
