ՀՀ Ֆինանսների նախարարությունը վերակազմակերպվել է։ ՀՀ Նախագահ Սերժ Սարգսյանի հրամանագրով մաքսային և հարկային կառույցներն առանձնացվել են ՀՀ ֆինանսների նախարարությունից:
ՀՀԿ խմբակցության ղեկավար Վահրամ Բաղդասարյանն այս քայլը համարում է վերջին շրջանում քաղաքական դաշտում արձանագրվող փոփոխությունների տրամաբանական շարունակություն. «ԵՏՄ անդամակցություն, սահմանադրական բարեփոխումներ, երկու քաղաքական ուժերի համաձայնագիր, ՀՀ նախագահի փետրվարի 12-ի ելույթ և դրանից բխող դրույթների իրականացում և նոր տնտեսական քաղաքականության մշակում, որի համար նպատակահարմար է այդ տարանջատումը»:
Նրա խոսքով՝ դեռևս քննարկում չի եղել, թե վերակազմավորված կառույցներում ովքեր կստանձնեն նոր պաշտոններ: «Ամբողջ թիմը Սերժ Սարգսյանի յուրայիններն են, մեր թիմի մեջ չկան օտարներ և յուրայիններ: ՀՀԿ-ում բոլորը յուրայիններ են, և մեր պայքարը թիմային պայքար է»:
Վ. Բաղդասարյանի խոսքով՝ քաղաքական զարգացումներին զուգահեռ պետք է լինեն տարանջատումներ և միավորումներ: «ՀՀ-ում նախարարությունների թիվը շատ է, կա օպտիմալացման խնդիր, բայց դա չի նշանակում, որ չեն կարող լինել տարանջատումներ»,- նշեց ՀՀԿ խմբակցության ղեկավարը՝ հավելելով, որ քաղաքական զարգացումները նոր պահանջներ են թելադրում, և կառուցվածքային փոփոխություններ են իրականացվում:
Մանրամասներ՝ տեսանյութում:
