Իրաքի մայրաքաղաք Բաղդադում տեղի ունեցած հերթական պայթյունը խլել է առնվազն 13 մարդու կյանք: Մեկ օրվա ընթացքում երկրում պայթյունների և հարձակումների հետևանքով զոհերի թիվը գերազանցել է 70-ը, հաղորդում է Associated Press-ը:
Հաղորդվում է, որ Ալ-Շաաբ շիական թաղամասի շուկայում պայթել է ականապատ մեքենա: Ահաբեկչության հետևանքով բոլոր զոհվածները եղել են խաղաղ բնակիչներ:
Ավելի վաղ Բաղդադի շիական թաղամասերում և Բասրա քաղաքի հարավում ևս տեղի են ունեցել մի քանի պայթյուններ։ Վերջին տվյալներով՝ այդ ահաբեկչությունների հետևանքով զոհվել է առնվան 46 մարդ: Կիրակի լույս երկուշաբթի գիշերը գրոհայիններն Անբար մարզում հարձակվել են ոստիկանական երկու տեղամասերի վրա, ինչի հետևանքով զոհվել է 12 մարդ:
Բացի այդ, Բաղդադի հյուսիսում տեղի ունեցած ահաբեկչության հետևանքով զոհվել է իրանցի 14 ուխտագնաց:
Երկրում բռնության սրման ֆոնի վրա Իրաքի վարչապետ Նուրի Ալ-Մալիքին հայտարարել է, որ մոտակա ժամանակներս Իրաքի անվտանգության ծառայություններում տեղի կունենան կադրային փոփոխություններ:
ՄԱԿ-ի փորձագետների հաշվարկներով՝ ապրիլին ահաբեկիչների ձեռքով Իրաքում մահացել է ավելի քան 700 քաղաքացի:
