Ադրբեջանական Trend լրատվական գործակալության փոխանցմամբ՝ Իրանի ու Ադրբեջանի երկաթուղիները կմիացվեն մինչև 2016 թվականի ավարտը։ Այդ մասին Թեհրանում Ադրբեջանի նախագահ Իլհամ Ալիևի հետ համատեղ մամուլի ասուլիսի ժամանակ հայտարարել է Իրանի նախագահ Հասան Ռուհանին:
«Ինչ վերաբերում է «Հյուսիս-հարավ» միջանցքի ու տարանցման հարցերին, ապա Աստարա (Իրան) – Աստարա (Ադրբեջան) երկաթուղիների միացումը տեղի կունենա մինչև տարեվերջ և կդառնա կարևոր իրադարձություն»,- ասել է նա։
«Հյուսիս-հարավ» երկաթուղին Հյուսիսային Եվրոպան կապելու է Հարավարևելյան Ասիայի հետ։ Այն ծառայելու է որպես Ռուսաստանի, Ադրբեջանի ու Իրանի երկաթուղիների միացման օղակ։
Նախնական գնահատականներով՝ երկաթուղու թողունակությունը կազմելու է տարեկան 1.4 միլիոն ուղևոր և 5-7 միլիոն տոննա բեռ։ Հետագայում պլանավորված է բեռնափոխադրումների ծավալը հասցնել տարեկան 15-20 միլիոն տոննայի։
