Միջազգային հանրությունը մոտ է Սիրիայում բռնության նվազեցմանը և ռազմական գործողությունների դադարեցմանը՝ ինչպես երբեք երկար տարիների ընթացքում: TASS-ի հաղորդմամբ՝ այս մասին երկուշաբթի հայտարարել է Գերմանիայի ԱԳՆ ղեկավար Ֆրանկ-Վալտեր Շտայնմայերը Կիև այցի ընթացքում:
«Կուլիսների հետևում ինտենսիվ բանակցությունների 10 օրերը Մյունխենում պայմանավորվածությունների ձեռքբերումից հետո հիմա պտուղներ են տալիս: Մենք դեռ նպատակին մոտ չենք, բայց բռնության նվազեցման և ռազմական գործողությունների դադարեցման մասին համաձայնագրի ձեռքբերումը մոտ է, ինչպես երբեք երկար տարիների ընթացքում»,- մեջբերում է Շտայնմայերի խոսքերը Գերմանիայի արտաքին քաղաքական գերատեսչությունը:
«Վիեննական գործընթացի մասնակից երկրներից յուրաքանչյուրը պետք է հասկանա, որ վտանգված է: Սիրիայում հակամարտության այն կողմը, որը չի պահպանի կրակի դադարեցման ռեժիմը, ակնհայտ է, հետաքրքրված չէ քաղաքական լուծման հարցում, նրան կսպասի միջազգային հանրության վճռական արձագանքը»,- ասել է գերմանացի նախարարը:
Զինադադարի հասնելը «հաջողություն և հույսի շող կլիներ Սիրիայի բնակիչների համար», նշել է Շտայնմայերը:
Երկուշաբթի երեկոյան տարածվել է ՌԴ և ԱՄՆ համատեղ հայտարարությունը, որում ասվում է, որ Սիրիայում կրակի դադարեցման ռեժիմը ուժի մեջ կմտնի փետրվարի 27-ին՝ 00:00-ին (Դամասկոսի ժամանակով, մեր ժամանակով՝ 02:00): Հայտարարության մեջ նշվում է, որ զինադադարի պայմանները տարածվում են հակամարտության բոլոր կողմերի վրա՝ բացառությամբ ԴԱԻՇ և «Ջեբհաթ ան-Նուսրա» և ՄԱԿ-ի ԱԽ կողմից այդպիսին ճանաչված այլ ահաբեկչական խմբավորումների:
