Թուրքական Cumhuriyet թերթի փոխանցմամբ՝ քրդամետ «Ժողովուրդների դեմոկրատական» կուսակցության (ԺԴԿ) համանախագահ Ֆիգեն Յուքսեքդաղը մեկնաբանել է Անկարայում իրականացված վերջին պայթյունն ու Սիրիայի հետ սահմանին կատարվող դեպքերը:
«Անկարայի հարձակման պատասխանատվությունը, որի հետևանքով զոհվել է 28 մարդ, (Սիրիայի քրդերի) «Դեմոկրատական միություն» կուսակցության (PYD) վրա բարդելը քաղաքական ակնհայտ դավադրություն է։ Կառավարությունը Սիրիա ներխուժելու համար «արդարացումների» (հիմնավորումների) փնտրտուքի մեջ է։ Թուրքիայում նախկինում իրականացված հարձակումների թիրախում ամեն անգամ գտնվել են ԺԴԿ-ն ու դեմոկրատները, ալավիները։ Մինչդեռ այժմ (Անկարայի պայթյունից) 2-3 ժամ անց, երբ դեռ ոչ մի կերպ բացահայտված չէ հանցագործը, ասում են, թե դա արել է PYD-ը»,- ասել է ԺԴԿ համանախագահը։
Յուքսեքդաղը դատապարտել է նաև ընդդիմադիր «Ժողովրդա-հանրապետական» կուսակցության (ԺՀԿ) նախկին նախագահ, Անթալիայից ընտրված պատգամավոր Դենիզ Բայթալի սկանդալային այն հայտարարությունը, թե «Հալեպը սուննի քաղաք է, և պետությունը (Թուրքիան) այն ռմբակոծելու իրավունք ունի»։ Յուքսեքդաղն ընդգծել է, որ իրականում ալավիներն են դիտարկվում որպես այդ հողերի զավակներ։
