Եվրահանձնաժողովը սկսում է Վիլնյուսում նոյեմբերին կայանալիք Արևելյան գործընկերության գագաթաժողովի ժամանակ Ուկրաինայի հետ Ասոցացման համաձայնագրի հնարավոր ստորագրման և Ազատ առևտրի գոտու ստեղծման նախապատրաստական աշխատանքները: Համաձայնագրի ստորագրումը կախված կլինի Ուկրաինայի կողմից որոշ պայմաններ կատարելուց, որոնք կգնահատվեն հաջորդ կես տարվա ընթացքում: Նման որոշում է ընդունել Եվրահանձնաժողովի անդամների խորհուրդը, հաղորդում է «Ուկրինֆորմը»:
«Առանց կանխատեսելու համաձայնագրի հնարավոր ստորագրման վերաբերյալ քաղաքական որոշումները՝ Եվրահանձնաժողովն այսօր ընդունել է ԵՄ Խորհրդի որոշման վերաբերյալ առաջարկությունները՝ ԵՄ-Ուկրաինա Ասոցացման համաձայնագրի նախաստորագրման և ժամանակավոր գործարկման մասին»,- նշվել է Եվրահանձնաժողովի հայտարարության մեջ:
«ԵՄ-ն ընդգծում է, որ համաձայնագիրը կստորագրվի միայն այն դեպքում, եթե Ուկրաինան ստեղծի համապատասխան քաղաքական պայմաններ»,- նշել են Եվրամիության ներկայացուցիչները:
