Հայաստանում ԱՄՆ դեսպան Ռիչարդ Միլսի կարծիքով՝ Հայաստանի տնտեսությունը հասել է կայացման ու բարեփոխումների մի մակարդակի, որով գրավիչ է դառնում ամերիկյան ներդրումների համար: Այս մասին նա հայտարարեց Հայաստանում իր պաշտոնավարման մեկամյակի կապակցությամբ կազմակերպված ֆեյսբուքյան առցանց ասուլիսի ժամանակ՝ պատասխանելով «Առաջին լրատվական»-ի հարցին:
Ստորև ներկայացնում ենք հարցն ու պատասխանը:
«Առաջին լրատվական»- Պարոն դեսպան, ինչպե՞ս կմեկնաբանեք ԱՄՆ նախագահ Բարաք Օբամայի հայտարարությունը, որ «2015-ին ամերիկյան ներդրումների պատմական մակարդակը Հայաստանում միայն սկիզբն է»: Այս ուղղությամբ արդեն կա՞ն գործնական ինչ-որ քայլեր, ինչպիսի՞ ներդրումներ են սպասվում Հայաստանում, և ամերիկյան ո՞ր ընկերություններն են շահագրգռված: Կոռուպցիան Հայաստանում, որի մասին բազմիցս խոսել եք, չի՞ խանգարի ամերիկյան կապիտալին գործել Հայաստանում:
Ռիչարդ Միլս- Նախագահ Օբամայի մեկնաբանությունները արտացոլում են դեսպանության ու ԱՄՆ կառավարության առաջնահերթությունները Հայաստանում՝ ամերիկյան ներդրումներն ու առևտրի ծավալի մեծացումը: Անցած տարի եղան կարևոր զարգացումներ, այդ թվում՝ Որոտանի հիդրոկասկադի գործարքը՝ ամենախոշոր ամերիկյան մեկանգամյա ներդրումը Հայաստանում: Նաև ստորագրվեց Առևտրի և ներդրումների շրջանակային համաձայնագիր Հայաստանի և Միացյալ Նահանգների միջև, որը նախատեսված է օգնել երկու երկրների կառավարություններին առևտրի խոչընդոտների երկուստեք վերացման հարցում: Իմ կարծիքով՝ այս ամենն արտացոլում է այն իրողությունը, որ Հայաստանի տնտեսությունը հասել է կայացման ու բարեփոխումների մի մակարդակի, որով գրավիչ է դառնում ամերիկյան ներդրումների համար:
Նաև Իրանի նկատմամբ պատժամիջոցների վերացումը կարող է Հայաստանը դարձնել կարևոր հարթակ ամերիկյան բիզնեսի ընդլայնման համար Իրանի հետ: Ավելի շատ ներդրումներ ներգրավելու դեսպանատան նպատակը ընթանում է կոռուպցիայի կրճատմանն ուղղված ՀՀ մեր գործընկերների հետ աշխատանքին զուգահեռ: Հավասար խաղի պայմանների ապահովումը բոլոր բիզնեսների համար՝ լինեն հայկական, օտարերկրյա, թե ռուսական, խիստ կարևոր է: Մենք կարող ենք ներդրումներ ներգրավել՝ օգնելով կրճատել կոռուպցիան՝ ի շահ բոլոր նրանց, ովքեր Հայաստանում զբաղվում են բիզնեսով:
Լուսանկարը՝ Photolure-ի
