Եթե պետք է չեզոքություն պահպանի` ինչու էր նախարարը «Այո» քարոզում. «Սեյրան Օհանյանի հրահանգով» ազատված ակտիվիստը հակադարձում է

Քաղաքացիական ակտիվիստ, Պաշտպանության նախարարության խաղաղապահ զորքերում պայմանագրային հիմունքներով աշխատող Տիգրան Մազմանյանը նախօրեին պաշտպանության նախարարի հրամանով ազատվել է աշխատանքից քաղաքական հայացքների համար։ Զորամասի հրամանատար, գեներալ-մայոր Արթուր Սիմոնյանը մի քանի անգամ զգուշացրել է՝ ակցիաների չմասնակցել կամ դուրս գալ աշխատանքից։ Ի վերջո ընտրվել է երկրորդ տարբերակը։

Հունվարի 15-ին մարտական ծառայությունից վերադառնալուց հետո զորամասից կանչում են Տիգրանին, նրան ցույց են տալիս ազգային անվտանգության ծառայության կողմից պատճենահանված ֆեյսբուքյան էջի լուսանկարները, Տիգրանի լուսանկարը Շանթ Հարությունյանի որդու՝ Շահեն Հարությունյանի հետ, գրառումները՝ պահանջելով բացատրություն տալ։

Պաշտպանության նախարար Սեյրան Օհանյանն այսօր չի հերքել ակտիվիստի պնդումները, որ վերջինս աշխատանքից ազատվել է քաղաքական հայացքների համար։

Ակտիվիստը հակադարձում է, եթե զինվորականությունը պետք է չեզոքություն պահպանի, ապա ինչու էր Սահմանադրական բարեփոխումների հանրաքվեի ժամանակ նախարարը «Այո»-ի քարոզ իրականացնում։

Տիգրանը նկատում է՝ իր հետ կատարվեց այն, ինչի դեմ ինքը պայքարում էր, հետևաբար կշարունակի ավելի ուժգին գործել։

Ակտիվիստը չի պատրաստվում դատական կամ այլ ճանապարհով վիճարկել իր աշխատանքից ազատման հրամանը։ Իմաստ չի տեսնում։ Իր հետ կատարվածը համարում է զգուշացում բոլոր նրանց, ովքեր կհամարձակվեն ծառայությանը զուգահեռ քաղաքացիական ակտիվություն ցուցաբերել։