Վրաստանն ինքը կորոշի իր ճակատագիրը՝ իր հասարակության շրջանակներում, չնայած պատրաստ է օգնություն ընդունել: Ինչպես հաղորդում է «Գրուզիա Օնլայն»-ը, այս մասին հայտարարել է Վրաստանի վարչապետ Բիձինա Իվանիշվիլին:
Նա ընդգծել է, որ նախորդ կառավարությունը կողմնորոշված էր դեպի Արևմուտք և ԱՄՆ, նրա համար ամենակարևորը եղել է միջազգային հանրության գնահատականը:
«Մենք անում ենք ամեն ինչ՝ Վրաստանի ներսում իրավիճակը հարթելու համար, քանի որ ես ցանկանում եմ ոտքերի վրա կանգնած իմ երկրին ներկայացնել արտասահմանում»,- ասել է Իվանիշվիլին:
Վրաստանի վարչապետը նշել է, որ խոսակցություններն այն մասին, թե իրեն չեն ընդունում արտասահմանում, «հիմարություն են»:
«Ես հրաժարվել եմ Լեհաստան մեկնելուց, իսկ մինչ այդ՝ Ռումինիա: Հետաձգել եմ այցը Ֆրանսիա, Գերմանիա ևս կայցելեմ միայն ընտրություններից հետո, իսկ ԱՄՆ-ում ինձ այսօր էլ են սպասում, սակայն ցանկանում եմ այնտեղ լինել այն բանից հետո, երբ ավելի շատ բան կանեմ իմ երկրի համար»,- նշել է նա:
Իվանիշվիլին կարծում է, որ սկզբում պարտավոր է լուծել Վրաստանի ներսում առկա խնդիրները և միայն դրանից հետո մեկնել արտասահման:
