«Բարգավաճ Հայաստանը» որոշել է վերցնել Երևանի ավագանու ընտրությունների մանդատները՝ Գագիկ Ծառուկյանի եկեղեցու օծման նախօրեին հայտարարել է այդ կուսակցության ներկայացուցիչ Նաիրա Զոհրաբյանը: Փաստորեն, ԲՀԿ-ն եկեղեցու օծման է գնում առանց կիսատ-պռատ գործերի: Պարզվում է նաև, որ Գագիկ Ծառուկյանը հանձնարարել է կուսակցության Երևանի ավագանու անդամներին, որ նրանց աշխատատեղերը բակերն են լինելու, ոչ թե փափուկ առանձնասենյակները:
Կուսակցության ցուցակի առաջին երեքը ինքնաբացարկ են տվել՝ Օսկանյան, Արսենյան, Աբրահամ Մանուկյան: Նրանք կմնան խորհրդարանի մանդատների տեր: Իսկ ԲՀԿ-ի 17 հոգանոց ավագանին, համենայնդեպս այս պահի դրությամբ, պետք է ամեն օր աշխատի թաղերում, որի խնդիրներին քարոզարշավի ընթացքում մանրակրկիտ ծանոթացել են, ինչպես հայտարարել է Նաիրա Զոհրաբյանը:
Այս հայտարարությունն առնվազն տարօրինակ կարելի է համարել մի ուժի համար, որը Երևանի ավագանիում մինչև այս էլ ուներ թվով երկրորդ խմբակցությունը՝ 2009 թվականի ընտրությունների արդյունքում: Այդ խմբակցությունը չորս տարի շարունակ եղել է ավագանիում, հանդիսացել է Երևանի կառավարման մասնակիցներից մեկը և թեև ՀՀԿ-ն չուներ ԲՀԿ-ի քվեարկությունների կարիքը, բայց ԲՀԿ-ի խմբակցությունը կողմ է քվեարկել ՀՀԿ-ի բոլոր որոշումներին: Եվ ահա, նման իրավիճակում այսօր կուսակցությունը հայտարարում է, որ քարոզարշավի ընթացքում տեղեկացել է երևանցիների բոլոր խնդիրներին մանրամասն: Եթե նման բան հայտարարեր ավագանիում և ընդհանրապես Երևանում հենց նոր երկնքից իջած այլմոլորակայինների կուսակցությունը, ապա այսքան էլ տարօրինակ չէր լինի, սակայն երբ այս մասին հայտարարում է ԲՀԿ-ն, ապա առնվազն տրամաբանական է դառնում գոնե նախորդ չորս տարիների ընթացքում լիակատար անտեղյակության համար ժողովրդից ներողություն խնդրելը:
ԲՀԿ-ն` որպես Երևանի ավագանիում երկրորդ ուժ և որպես Տարոն Մարգարյանի ուժի` ՀՀԿ-ի բոլոր գործերին կողմ քվեարկած ուժ, պետք է ներողություն խնդրի քաղաքացիներից, որ չորս տարի ավագանիում աշխատել է առանց քաղաքային խնդիրներին մանրամասն տեղյակ լինելու, առանց տեղեկանալու, և նոր է միայն տեղեկացել՝ երբ նորից ընտրություններ են: Եթե ԲՀԿ-ն գնալու է բակեր, ապա ներողությունը պետք է լինի առաջին գործը, որ կուսակցության Երևանի ավագանու անդամները պետք է անեն այդ բակերում: Եվ միայն ներողությունից հետո քաղաքացիները կարող են շփվել այդ ներկայացուցիչների հետ, քանզի այլ պարագայում կարող ենք վստահաբար ասել, որ երևանյան բակերում լինելու են ընդամենը ցինիզմի հերթական դրսևորումները, որի վարպետն են դարձել Հայաստանի քաղաքական ուժերը:
Ըստ որում` ներողությունն ամենաքիչն է, որ պետք է անի ցանկացած մի ուժ, որը այս տարիներին լռությամբ կողմ է քվեարկել ՀՀԿ-ի և նրա քաղաքապետի որոշումներին, որոնցով Երևանը բառիս բուն իմաստով պարզապես թալանվել է: Այս թալանին լուռ հետևողներից ժողովուրդն իրավունք ունի առնվազն գոնե ներողություն պահանջելու, եթե ոչ դիտարկելու այդ լռությունը որպես իմանալ-չհայտնելու փաստեր, որոնք հանդիսանում են քրեորեն պատժելի արարք:
