Արմավիրի մարզի Արշալույս գյուղն անմասն չի մնացել երեկվա կարկուտից: Համայնքի ղեկավարի տեղակալ Գագիկ Շահգալդյանն «Առաջին լրատվական»-ի հետ զրույցում նշեց, որ գյուղում վերջին հիսուն տարում նման կարկուտ չի եղել: Նրա խոսքերով` գյուղատնտեսությունը ռիսկային տնտեսություն է, և ճիշտն ապահովագրման մեթոդ կիրառելն է, քանի որ այդ դեպքում բոլոր գյուղացիները կապահովագրեին իրենց հողատարածքը և հողագործություն կիրականացնեին:
Թեև Արշալույսը հանրապետության այն քիչ գյուղերից է, որտեղից արտագաղթը մեծ չափերի չի հասնում, սակայն եթե պետությունը կարկուտից տուժած ընտանիքներին փոխհատուցում չտա, արտագաղթը կմեծանա, հիասթափությունը կխորանա:
«Մարզպետը մեզ հանձնարարական է տվել, կազմվել է հանձնաժողով, և առավոտվանից բոլորը գալու են գյուղապետարան։ Մենք գրանցում ենք իրենց վնասի չափը, ներկայացնում ենք մարզպետին»,- ասաց Գագիկ Շահգալդյանը:
Արշալույսի բնակիչ Էդիկը տասը տարի, իր իսկ խոսքերով, էրեխու պես պահել է ծառերը, այսօր սակայն չունի ոչ մի բան, երեկվանից միայն խմում է՝ կատարվածը մոռանալու համար: Նա 30 հազար դոլարի վնաս է կրել:
Գագիկ Շահգալդյանն ասաց, որ այս գյուղում հինգ տարի է՝ հակակարկտային կայաններ կան, բայց նման կարկուտ չէին տեսել: «Խտացավ անձրևը, սառում է ամպը ու կարկուտ տալիս։ Մենք որ կրակում ենք, ամպը չի թողնում, որ սառչի,և եթե փոթորիկ է լինում, կարկտակայանը չի հասցնում այդ ամպն անընդհատ ցրել: Այս փոթորիկի դեպքում անհնար էր, այլապես սրանից ավելի հզոր ամպեր են եղել, կարողացել ենք պահել, որ կարկուտ չգա։ Կես ժամ առաջ սկսեցին կրակել, բայց՝ անօգուտ, քանի որ առկա էր փոթորիկ»,- ասաց Գագիկ Շահգալդյանը:
Նա նաև նշեց, որ տնամերձ հողամասերն առնվազն կես միլիոն դրամի չափով կորուստ են կրել. «Դե պատկերացրեք ցանքատարածություններն ու պտղատու այգիները…»։
