Կալիֆոռնիայի ոստիկանությունն արդեն 5-րդ օրն է՝ փնտրում է տղամարդուն, որը կասկածվում է կնոջ և իր երկու դուստրերի սպանության մեջ: Այս մասին հայտնում է Associated Press-ը:
45-ամյա Շեյն Ֆրանկլին Միլլերը չորեքշբաթի գիշերը Կալիֆոռնիայի հյուսիսային Շինգլթաուն քաղաքում կրակել էր 34-ամյա կնոջն ու 8 և 5 տարեկան աղջիկներին, որից հետո թաքնվել է անտառում:
Ոստիկանությունն ավելի վաղ Միլլերի լքված ավտոմեքենան հայտնաբերել էր Պետրոլիա քաղաքի մոտ՝ իր տնից 320 կմ արևմուտք, որտեղ կատարվել է եռակի սպանությունը: Անցած գիշեր որոնումներում ներգրավվել են երկու ուղղաթիռներ:
Հաղորդվում է, որ կասկածյալը զինված է և վտանգավոր: Հանցագործության դրդապատճառները հայտնի չեն: Ինչպես հայտնի է գործակալությանը՝ Միլլերն արդեն խնդիրներ ունեցել է օրենքի հետ: 2002 թվականին նա դատապարտվել էր 3 տարի 10 ամսվա ազատազրկման՝ զենքի անօրինական պահման համար: