«Եվրատեսիլ 2013» երգի միջազգային մրցույթը կիրակի պաշտոնապես բացվել է Շվեդիայի Մալմյո քաղաքի Օպերայի շենքում: 39 երկրների մասնակիցները 70 մետրանոց կարմիր գորգի վրայով հասել են հնագույն շենք, որտեղ նրանց դիմավորել են քաղաքի և շվեդական հարավային Սկոնե շրջանի իշխանությունների, եվրոպական հեռարձակող EBC միության և Շվեդիայի ազգային հեռուստատեսության՝ Sveriges Television-ի ներկայացուցիչները:
Անցկացվում են երգի 58-րդ մրցույթին նվիրված փորձեր, ասուլիսներ, երեկոներ: Միջոցառման լուսաբանման համար հավատարմագրվել է մոտ 500 լրագրող: Ընդհանուր առմամբ սպասվում է 100 հազար հյուր:
Մրցույթը կանցկացվի բազմաֆունկցիոնալ «Մալմյո արենա» համալիրում, որը կառուցվել է 2008 թվականին և նախատեսված է 15.5 հազար հանդիսատեսի համար:
Մրցույթի տոմսերը՝ 10-216 եվրո արժողությամբ, վաճառվել էին դեռևս անցած տարի՝ վաճառքի դուրս բերվելուց անմիջապես հետո:
Մրցույթի երկու կիսաեզրափակիչները տեղի կունենան մայիսի 14-ին և 16-ին, իսկ եզրափակիչը՝ մայիսի 18-ին: Շոուի հեռուստալսարանը կազմում է 125 մլն մարդ:
Մեկ տարվա բացակայությունից հետո Հայաստանը երգի մրցույթում կներկայացնի Գոռ Սուջյանը:
