Լիտվայի նախագահ Դալյա Գրիբաուսկայտեն կարծում է, որ Ռուսաստանի հետ փոխադարձ հարգանքը վերականգնելու համար 2 պետություններին էլ տասնամյակներ պետք կլինեն:
«Ես կարծում եմ՝ 10 տարին (2004-ից սկսած Լիտվան անդամակցում է ՆԱՏՕ-ին) պետության պատմության մեջ կարճ ժամկետ է մենթալիտետը փոխելու համար: Մեր ընդհանուր պատմությունից դեռևս շատ ցավոտ կետեր են մնացել»,- ասել է Գրիբաուսկայտեն՝ Deutsche Welle պարբերականի հետ հարցազրույցում:
«Մեզ համար դա արտահայտվում է սահմանին ռազմական ներկայության ուժգնացմամբ, Ռուսաստանի կողմից տնտեսական ճնշմամբ, ինչպես օրինակ՝ էներգակիրների գների հետ կապված:
Ես նշեցի, որ 10 տարին բավարար ժամկետ չէ: Հնարավոր է՝ 40 տարի կպահանջվի, որպեսզի ազատվենք անցյալի ցավոտ հարցերից և սկսենք փոխադարձ հարգանքով լեցուն համագործակցություն»,- ասել է Լիտվայի նախագահը:
