Պակիստանի նախկին վարչապետ Նավազ Շարիֆն ու նրա գլխավորած «Պակիստանյան մուսուլմանական լիգան» երեկ կայացած խորհրդարանական ընտրություններում ստացել են Ազգային ժողովի (խորհրդարանի ստորին պալատ) 272 մանդատներից առնվազն 85-ը: Այս մասին հայտնում է ITAR-TASS-ը: Սրանք նախնական տվյալներ են, ձայների հաշվարկն ավարտված չէ:
Պակիստանյան ժողովրդական կուսակցությունը, որի ղեկավարն է 24-ամյա Բիլավալ Զարդարին՝ Պակիստանի նախագահ Ասիֆ Ալի Զարդարիի և նրա կնոջ՝ երկրի պատմության մեջ առաջին կին վարչապետ, հանգուցյալ Բենազիր Բհուտտոյի որդին, ստացել է 18 մանդատ՝ առաջ անցնելով «Շարժում հանուն արդարության» կուսակցությունից, որը ստացել է 15 մանդատ:
Ակնհայտ առավելության համար Շարիֆին հաղթանակի կապակցությամբ շնորհավորել են բազմաթիվ պակիստանյան կուսակցությունների ու շարժումների առաջնորդներ: 63-ամյա Շարիֆն արդեն զբաղեցրել է երկրի վարչապետի պաշտոնը (1990-1993 և 1997-1999թթ.): 1999 թվականին Շարիֆը գեներալ Պերվես Մուշարաֆի իրականացրած հեղաշրջման արդյունքում տապալվել է ու բանտ նետվել, և միայն շնորհիվ Սաուդյան Արաբիայի ու ԱՄՆ-ի ճնշման նա ազատ է արձակվել ու արտաքսվել երկրից:
Նախընտրական արշավի ժամանակ նա ասել է, որ թալիբ ծայրահեղականների հետ բանակցությունների կողմնակից է և հավանություն չի տալիս հարևան Աֆղանստանում ԱՄՆ-ի ու ՆԱՏՕ-ի նրա դաշնակիցների ռազմական ներկայությանը:
