Թուրքիայի ՆԳ նախարար Մուամեր Գյուլերը հայտարարել է, որ Սիրիային սահմանակից Ռեյհանլի քաղաքի ահաբեկիչները կապված են սիրիական հատուկ ծառայությունների հետ: Այս մասին գրում է Hurriyet հրատարակչությունը:
Այսօր 15 րոպե դադարով երկու պայթյուններ են որոտացել Ռեյհանլիի քաղաքապետարանի մոտ և արտադրական թաղամասում: Ահաբեկչական գործողությանը զոհ են դարձել 45 մարդ, ավելի քան 100-ը վիրավորվել են:
Թուրքական NTV հեռուստաալիքի փոխանցմամբ՝ հատուկ ծառայությունները պայթյունների հետ կապված հինգ մարդու են ձերբակալել, որոնցից երեքը Սիրիայի քաղաքացիներ են:
Ռեյհանլիում 20-25 հազար սիրիացի փախստականներ են ապրում, որը տեղի բնակչության մոտ արդեն դժգոհություններ է առաջացնում: Չնայած դրան՝ Թուրքիան հայտարարել է, որ կշարունակի հյուրընկալել սիրիացի փախստականներին:
Պայթյուններից ընդամենը մի քանի ժամ անց փոխվարչապետ Բյուլենթ Արընչը հայտարարել է, որ չի բացառում ահաբեկչական գործողությանը Սիրիայի կառավարության մասնակցությունը, որի նպատակը, նրա կարծիքով, բազմաթիվ փախստականներն են, ովքեր ստիպված են եղել լքել իրենց հայրենիքը: Փոխվարչապետը նշել է, որ անկախ նրանից, թե ովքեր են կանգնած ահաբեկչական գործողության հետևում, Թուրքիան պատասխան միջոցներ կձեռնարկի:
Իր հերթին Գերմանիայում այցելությամբ գտնվող Թուրքիայի ԱԳ նախարար Ահմեդ Դավութօղլուն հայտարարել է, որ պայթյունները կարող են սադրանքներ լինել: Նրա կարծիքով՝ շատ ուժեր կան, որոնք ցանկանում են խախտել երկրի ներքին հանգիստը: ԱԳ նախարարը, սակայն, հայտարարել է, որ նրանք միշտ պայքարել են և դեռ կպայքարեն այդ ուժերի դեմ:
