Bloomberg-ի լրագրողները տարիներ շարունակ խախտել են իրենց հաճախորդների անձնական տվյալների գաղտնիությունը, հաղորդում է The New York Times-ը:
Պարբերականը նշում է, որ լրագրողներն իրականացնում են ֆինանսական տերմինալների օգտագործման մոնիտորինգ, որպեսզի ամենայն հավանականությամբ ամենաշուտը տեղեկատվություն ստանան շուկաներում:
Թղթակիցների կողմից նման պրակտիկայի կիրառումը ակնհայտ դարձավ այն բանից հետո, երբ Goldman Sachs-ը բողոք ներկայացրեց տեղեկատվական ծառայության լրագրողներից մեկի դեմ, որը հետաքրքրվել է` արդյոք բանկում աշխատո՞ւմ է տվյալ աշխատակիցը: Թղթակիցը նշել է, որ Goldman Sachs-ի ծառայակիցը վերջին ժամանակներս չի այցելել Bloomberg-ի ֆինանսական տերմինալ, ինչն իբրև թե վկայում է այն մասին, որ բանկի աշխատակիցը դուրս է եկել աշխատանքից:
The New York Times-ը` վկայակոչելով անանուն աղբյուրները, հաղորդում է, որ Bloomberg-ի լրագրողները տեղեկատվություն քաղելու նման մեթոդը կիրառել են 1990-ական թվականներից ի վեր:
Bloomberg-ի մրցակիցներից մեկը` Reuters-ը, մեկնաբանելով իրավիճակը, ընդգծել է, որ Reuters-ի տեղեկատվական ստորաբաժանումը և բաժինը, որը զբաղվում է ֆնանսական տերմինալներով, անկախ են աշխատում միմյանցից:
Ինչպես հաղորդում է Associated Press-ը, Bloomberg-ի գլխավոր տնօրեն Դենիել Դոկտորոֆը ստեղծված իրավիճակն անվանել է «սխալմունք» և հայտարարել է, որ տեղեկատվական գործակալությունների լրագրողները այսուհետ չեն կարող հաճախորդների տվյալներին հասանելիություն ունենալ, որոնք օգտագործում են Bloomberg-ի ֆինանսական տերմինալները:
