ՄԱԿ-ի էլեկտրակապի միջազգային միության կանխատեսման համաձայն՝ 2014թ. դեկտեմբերին գրանցված հեռախոսների թիվը կգերազանցի 7 միլիարդը: Այս մասին հաղորդում է BBC-ի ռուսական ծառայությունը:
Ներկայում Երկրի բնակչությունը կազմում է 7.1 միլիարդ, իսկ բջջային հեռախոսներահամարների թիվը՝ 6.8 միլիարդ:
Զեկույցում նշվում է, որ 2013թ. ընթացքում Երկրի բնակչության ավելի քան 1/3-ը բջջային կապի մշտական հասանելիություն ունի: ԽՍՀՄ նախկին երկրներում գրանցված է համարների ամենաշատ թվաքանակը՝ բնակչության մեկ շնչի համար կազմում է 1.7:
Աֆրիկայում այդ ցուցանիշն ամենացածրն է՝ 100 բնակչի համար ընդամենը 63 համար:
«Ամեն օր մենք մոտենում ենք այն պահին, երբ բջջային հեռախոսահամարները համեմատվում են մեր մոլորակի բնակիչների թվի հետ»,- ասել է էլեկտրակապի միջազգային միության ներկայացուցիչ Բրահիմա Սանուն:
Նա կարծում է, որ բջջային հեղափոխությունը զարգացող երկրներում մարդկանց նոր հնարավորություն է շնորհում կրթության, առողջապահության, կառավարման, ֆինանսների, առևտրի ոլորտներում:
Եվրոպայում բնակչության 75%-ն օգտվում է բջջային կապից և բջջային համացանցից, իսկ երկրորդ հորիզոնականում է Հյուսիսային և Հարավային Ամերիկան՝ 61%, Ասիայում այդ ցուցանիշը կազմում է 32%, իսկ Աֆրիկայում՝ 16%:
Միության գլխավոր քարտուղար Համադուն Տուրեն նշել է, որ մոլորակի բնակչության 2/3-ը՝ շուրջ 4.5 միլիարդ մարդ, չի օգտվում բջջային կապից:
«Իսկ դա նշանակում է, որ մարդկության 2/3-ը զրկված է գլոբալ խոշորագույն շուկայի հասանելիությունից»,- ասել է նա:
