Բոստոնի մարաթոնի մասնակիցները, որոնք վերջնագծին չկարողացան հասնել տեղի ունեցած ահաբեկչության հետևանքով, քաղաքի իշխանություններին ու Ատլետիկայի բոստոնյան ասոցիացիային միջնորդություն են ներկայացրել՝ խնդրելով մարաթոնը կրկին անցկացնելու հնարավորություն տալ: Այս մասին ասվում է «Երկրորդ հնարավորություն» նախաձեռնության մամլո հաղորդագրությունում՝ փոխանցում է MIGnews.com-ը:
Միջնորդության նախաձեռնող, ամերիկացի Ռայոն Փոլիի խոսքով՝ հազարավոր վազորդներ ծանր էմոցիոնալ վիճակում են, և նրանց անհրաժեշտ է այն զգացումը, որը կարող է միայն մարաթոնյան եզրագիծը տալ:
Մարաթոնի 5700 մասնակիցները չեն կարողացել 42 կմ ճանապարհը հաղթահարել երկու պայթյունների հետևանքով, որոնք ապրիլի 15-ին որոտացին եզրագծի մոտ: Շատերը կարծում են, որ նախաձեռնությունը մասնակիցներին ու քաղաքի բնակիչներին կօգնի վերադառնալ կյանքի բնականոն հուն՝ ցույց տալով, որ ահաբեկչությունը չի կարող կոտրել իրենց կամքը:
