Եվրոպական հանձնաժողովը մտադիր է բանկերին պարտավորեցնել ընթացիկ հաշիվներ բացել ԵՄ բոլոր բնակիչների համար: Այս մասին հայտնում է Deutsche Welle-ն:
Բրյուսելում չորեքշաբթի հրապարակված օրինագծի համաձայն՝ նման հնարավորություն պետք է տրամադրեն ոչ բոլոր բանկերը. ԵՄ յուրաքանչյուր երկրում պետք է լինի առնվազն մեկ բանկ, որում ԵՄ-ի բոլոր բնակիչները կկարողանան իրականացնել տարրական բանկային գործարքներ, ինչպիսիք են աշխատավարձերի, նպաստների ու կենսաթոշակների ստացումը և այլն:
Եվրահանձնաժողովի տվյալներով՝ ներկայում ԵՄ երկրների 15 տարեկանից բարձր 58 միլիոն քաղաքացիներ չունեն ընթացիկ բանկային հաշիվներ:
Բուլղարիայում և Ռումինիայում նման քաղաքացիների թիվը կազմում է բնակչության մոտ կեսը:
Իրավապաշտպանները վաղուց են քննադատում բարդացող պրակտիկան, երբ բանկերը հրաժարվում են բացել հաշիվներ չունևոր քաղաքացիների կամ այն քաղաքացիների համար, ովքեր պարտքեր են կուտակել: Ոմանք կարծում են, որ նման իրավիճակը կհանգեցնի սոցիալական անհավասարության սրման և կխոչընդոտի աղքատության դեմ պայքարին:
