Դաքքայում 8-հարկանի շինության փլուզումից հետո, որը խլել էր ավելի քան 800 մարդու կյանք, Բանգլադեշի իշխանությունները անվտանգության նկատառումներից ելնելով հայտարարել են հագուստի 18 ֆաբրիկայի փակման մասին: Այս մասին հայտնում է RIA Novosti-ն՝ հղում կատարելով երկրի տեքստիլ արդյունաբերության նախարար Աբդուլ Լատիֆ Սիդիկի հայտարարությանը:
«Դաքքայում փակվել է 16 ֆաբրիկա, ևս 2-ը՝ Չիտագոնգում: Մենք եկել ենք այն եզրակացության, որ նրանք, ովքեր հայտարարել են, որ իրենց ձեռնարկություններն աշխատում են Բանգլադեշում ընդունված կանոնների համաձայն՝ ամբողջ ծավալով չեն հետևել շինարարության ժամանակ անհրաժեշտ պայմաններին»,- հայտարարել է նախարարը: Նա նշել է, որ փակվելու են նաև այլ ձեռնարկություններ:
Երկուշաբթի Բանգլադեշում ստեղծվել է հանձնաժողով, որի նպատակն է ստուգել շուրջ 4,5 հազար ֆաբրիկաների համապատասխանությունը անվտանգության կանոններին:
