ԱՄՆ նախագահ Բարաք Օբաման մեկ տարով երկարաձգել է «Սիրիայի կառավարության գործողությունների հետ կապված արտակարգ իրավիճակի ռեժիմը»: Համաձայն ԱՄՆ վարչակազմի օրենքների՝ այդ որոշումը հիմք է տալիս անհրաժեշտության դեպքում խստացնել սիրիական իշխանությունների նկատմամբ պատժամիջոցները: Այս մասին հաղորդում է ITAR-TASS-ը:
ԱՄՆ Կոնգրեսին ուղղված նամակում Օբաման պարզաբանել է, որ «Սիրիայի ներկայիս կառավարության գործողությունները և քաղաքականությունը՝ ներառյալ քիմիական և կենսաբանական զենքի մշակումը, ահաբեկչական կազմակերպություններին աջակցությունը, Լիբանանի գործերին միջամտությունը, մեծապես սպառնում են Ամերիկայի Միացյալ Նահանգների ազգային անվտանգությանը, արտաքին քաղաքականությանը և տնտեսությանը: Դաժան պատերազմը, որը ռեժիմը վարում է սիրիացի ժողովրդի դեմ, վտանգի է ենթարկում ոչ միայն Սիրիայի քաղաքացիներին, այլև անկայունությամբ է սպառնում ամբողջ տարածաշրջանին»:
Օբաման նախագահ Բաշար Ասադին մեղադրել է «դաժան բռնության և մարդու իրավունքները խախտելու մեջ»: Օբաման նրան կոչ է արել լքել իր պաշտոնը և հնարավորություն տալ Սիրիայում իրականացնել ժողովրդավարական բարեփոխումներ:
