ԲՀԿ խմբակցության քարտուղար Նաիրա Զոհրաբյանն այսօր հարցազրույց է տվել Zham.am-ին և հարցին, թե՝ «այսօր օրաթերթերից մեկը, հղում անելով ԲՀԿ աղբյուրին, տեղեկացնում է, թե մայիսի 5-ից հետո ԲՀԿ-ում շոկ է: Կա՞ նման բան», հայտարարել է. «Ո՛չ, չկա: Ավելին՝ ինձ համար հասկանալի չէ, թե ԲՀԿ այդ աղբյուրի մոտ, որը, ի դեպ, ԲՀԿ համամասնական ցուցակի առաջին եռյակում է, ինչո՞ւ է շոկ առաջացել»:
Այսպիսով, Նաիրա Զոհրաբյանը «բացահայտել է» ԲՀԿ-ական աղբյուրը, որը ներքին ինֆորմացիա է տրամադրել: Ընդ որում` հայտարարելով, որ այդ «աղբյուրը» ԲՀԿ ցուցակի առաջին եռյակում է: Նշենք, որ այդ մասին գրել էր «Հրապարակ» օրաթերթը: Ինչպես հայտնի է` ԲՀԿ ավագանու ցուցակի առաջին երեք համարն են Վարդան Օսկանյանը, Գուրգեն Արսենյանն ու Աբրահամ Մանուկյանը: Մենք զանգահարեցինք ԲՀԿ եռյակին` տեղեկանալու համար, թե նրանցից ո՞ւմ նկատի ունի տիկին Զոհրաբյանը «ԲՀԿ-ական աղբյուր» ասելով, սակայն որևէ մեկը չպատասխանեց մեր հեռախոսազանգերին:
Ի վերջո, Նաիրա Զոհրաբյանի հայտարարությունից կարելի է ենթադրել, որ ԲՀԿ-ում եթե ընտրություններից հետո շոկ չկա, ինչը, սակայն, կարելի էր նկատել նաև տեղամասերում հաշվարկի ժամանակ ԲՀԿ-ականների դեմքին նայելով, ապա պառակտում հաստատ կա, և տիկին Նաիրան լծվել է ԲՀԿ «ականներին» բացահայտելու գործին:
Լուսանկարը` PanARMENIAN Photo-ի
