Երկուշաբթի Իրանը դիմել է ՄԱԿ-ի գլխավոր քարտուղար Պան Գի Մունին և Անվտանգության խորհրդին՝ խնդրելով արձագանքել Սիրիայի տարածքի վրա Իսրայելի օդուժի «հանցավոր և անպատասխանատու» ավիահարվածներին: Այս մասին հաղորդում է ITAR-TASS-ը՝ վկայակոչելով ՄԱԿ-ում Իրանի մշտական ներկայացուցիչ Մուհամադ Խազայիի նամակը:
Իրանցի դիվանագետը հայտարարել է, որ ոչինչ չի կարող արդարացնել ուժի և ագրեսիայի կիրառումն ընդդեմ ինքնիշխան պետության: Նրա խոսքերով՝ Իսրայելի գործողությունները լրջորեն խախտում են միջազգային իրավունքը, առաջին հերթին՝ ՄԱԿ-ի կանոնադրությունում ամրագրված սկզբունքները:
Լիբանանը, որի օդային տարածքից իրականացվել են ավիահարվածներ Սիրիայում գտնվող թիրախների վրա, նույնպես ձգտում է, որպեսզի ՄԱԿ ԱԽ-ը դատապարտի Իսրայելի պահվածքը:
«Դա Լիբանանի ինքնիշխանության անարդար խախտում է»,- ասվում է նամակում:
Վերջին մի քանի օրերին Իսրայելի ռազմաօդային ուժերը մի շարք հրթիռային հարվածներ են հասցրել Սիրիայի տարածքին: ԶԼՄ-ների տվյալներով՝ ինքնաթիռների թիրախները եղել են իրանական հրթիռները՝ նախատեսված «Հըզբոլլահ» լիբանանյան շարժման գրոհայինների համար:
