Իրաքում ԴԱԻՇ-ի կողմից իրագործվող միջազգային մարդասիրական իրավունքի խախտումները որոշ դեպքերում կարող են որակվել որպես ռազմական հանցագործություններ, մարդկության դեմ հանցագործություններ և, հնարավոր է նույնիսկ՝ որպես ցեղասպանություն: TASS-ի հաղորդմամբ՝ այս մասին ասվում է իրաքյան հակամարտության պայմաններում քաղաքացիական բնակչության պաշտպանության մասին ՄԱԿ-ի՝ Ժնևում հրապարակված զեկույցում:
Փաստաթղթում նշվում է, որ ԴԱԻՇ-ը «շարունակում է իրագործել բռնության համակարգված և մասշտաբային ակտեր և մարդու իրավունքների ու միջազգային մարդասիրական իրավունքի խախտումներ»: «Այդ գործողությունները կարող են որոշ դեպքերում ռազմական հանցագործություններ լինել, հանցագործություններ մարդկության դեմ և, հնարավոր է՝ ցեղասպանություն»,- ասվում է զեկույցում, որը հիմնված է բռնությունից տուժած մարդկանց վկայությունների վրա:
Հետազոտության մեջ, որն ընդգրկում է մայիսի 1-ից մինչև հոկտեմբերի 31-ը, նշվում է, որ ԴԱԻՇ-ի գրոհայինները մեծ թվով խաղաղ բնակիչների են սպանել ու առևանգել: Ընդ որում՝ շատ հաճախ դա իրագործվել է «նպատակաուղղված»: Զոհերի թվում են նրանք, ում խմբավորումը համարել է իր գաղափարախոսության և կարգերի հակառակորդ, նաև պետական կառույցների հետ կապված իրաքցիներ՝ ներառյալ ոստիկաններ, բժիշկներ, իրավաբաններ, լրագրողներ: Շատ մարդկանց գործերը քննել են «ինքնանշանակ դատարանները», որոնք «ոչ միայն անթիվ մարդկանց են մահապատժի ենթարկել, այլև այնպիսի պատիժներ են սահմանել, ինչպիսին է, օրինակ, քարկոծումը»:
Փաստաթղթի համաձայն՝ 2014թ. հունվարի 1-ից մինչև 2015թ. հոկտեմբերի 31-ն Իրաքում 18.802 մարդ է սպանվել, 36.245-ը՝ վիրավորվել: Ավելի քան 3.200.000 իրաքցի ստիպված են եղել լքել իրենց տունը:
Մեծաթիվ վկայությւոններ կան, որ սպանությունները վերածվել են «սարսափելի հրապարակային ներկայացումների», երբ ԴԱԻՇ-ի անդամները գլխատել են մարդկանց, ողջ-ողջ այրել են, ճզմել են բուլդոզերներով: Տեղեկություններ են ստացվել զինվոր-երեխաների սպանության մասին, որոնք լքել են ռազմաճակատը Անբար նահանգում: Նաև ստուգված տեղեկություն կա, որ Մոսուլում ԴԱԻՇ-ն առևանգել է 800-900 երեխայի՝ կրոնական ուսուցման և ռազմական պատրաստության նպատակով: «ԴԱԻՇ-ը շարունակում է կանանց և երեխաներին սեքսուալ բռնության ենթարկել, հատկապես՝ սեքսուալ ստրկության ձևով»,- նշվում է զեկույցում:
ՄԱԿ-ի մարդու իրավունքների հարցերով գերագույն հանձնակատար Զեյդ Ռաադ ալ-Հուսեյնը նշել է, որ զոհերի թիվը Իրաքում խաղաղ բնակչության շրջանում կարող է շատ ավելի մեծ լինել, և կոչ է արել վերջ դնել անպատժելիությանը, որից օգտվում է նրանց մեծ մասը, ովքեր բռնություն են իրագործում:
ԴԱԻՇ-ի գրոհայիններն Իրաքի տարածքում անազատության մեջ են պահում մոտ 3.500 մարդու, հիմնականում կանանց և երեխաների՝ ասվում է զեկույցում:
Նշվում է, որ գերիները հիմնականում եզդիներ են:
