«Բանանց»-ի նորեկ Ացամազ Բուրաևը երկար տարիներ Վլադիկավկազի «Ալանիա»-ում, Վլադիվոստոկի «Լուչ»-ում և ռուսական այլ ակումբներում է հանդես եկել:
Ընթացիկ մրցաշրջանի առաջին մասը Վլադիկավկազում ծնված հարձակվողն անցկացրել է Կապանի «Գանձասար»-ում՝ Հայաստանի առաջնության 12 խաղում դառնալով հինգ գոլի հեղինակ:
«Բանանց»-ի պաշտոնական կայքին տված հարցազրույցում 25-ում խոսել է այն մասին, թե ինչ է նպաստել տեղափոխությանը և կիսվել է իր ակնկալիքներով:
– Բոլորը գիտեն, որ «Բանանց»-ը շատ ամբիցիոզ նոր ղեկավարություն ունի՝ ապագայի մեծ պլաններով: Այդ պատճառով շատ էի ուզում հայտնվել այստեղ և մասնակցել նրան, թե ինչպես է թիմը կայանում և վեր բարձրանում: Հուսով եմ, որ այդպես կլինի:
– Դու հարձակվող ես և հարձակվողից միշտ գոլեր են սպասում: Ինքդ քո առջև դրե՞լ ես անհատական նպատակներ մրցաշրջանի երկրորդ հատվածի համար:
– Անհատական նպատակը մեկն է՝ օգուտ բերել թիմին: Ինչ վերաբերվում է գոլերին, ապա տա Աստվա՛ծ սկսեմ առաջինից, իսկ հետո կտեսնենք:
– Ինչու՞ ես ընտրել մի փոքր տարօրինակ 90 համարի մարզաշապիկը:
– 9 համարը զբաղված էր, իսկ մինչ Հայաստանի ժամանելս Ռուսաստանում խաղում էի 90 համարի մարզաշապիկով: Տարին հաջողակ էր և հուսով եմ այդպես կլինի նաև այստեղ:
– Ինչի՞ հաշվին «Բանանց»-ը կարող է շտկել ստեղծված մրցաշարային իրավիճակը:
– Դրական գործոնները շատ են՝ լավ ֆուտբոլիստներ, լավ մարզչական շտաբ: Շուրջֆուտբոլային բոլոր հարցերը բարձր մակարդակի վրա են: Եթե մի փոքր բախտներս բերի, կարծում եմ՝ ամեն ինչ լավ կլինի:
– Արդեն մի քանի օր է աշխատում ես թիմի հետ: Ինչպիսի՞ն են առաջին տպավորությունները:
– Տպավորությունները միայն դրական են: Տղաներից մի քանիսին ճանաչում եմ, մյուսների հետ աստիճնաբար կծանոթանամ:
– Տարբեր քեզ անծանոթ լեզուները շատ են «Բանանց»-ում: Դժվար չէ՞ այդ առումով:
– Իսկապես անծանոթ լեզուները շատ են, բայց ամեն ինչ շատ հետաքրքիր է անցնում: Շատ հետաքրքիր տեստեր ենք անցնում այս օրերին, որպեսզի իմանանք, թե ինչի է ընդունակ օրգանիզմը, չափում են քաշը… Այսպիսի տեստերի կյանքում չէի հանդիպել: Շատ հետաքրքիր է և կարծում եմ հետագայում ավելի հետաքրքիր կլինի, երբ սկսվեն խաղային մարզումները:
– Ի՞նչ կցանկանայիր ասել «Բանանց»-ի երկրպագուներին:
– Ֆուտբոլիստներս խաղում ենք միայն երկրպագուների համար, իսկ մենք կփորձենք արդարացնել նրանց սպասելիքները:
