Տեխասի Վեսթ քաղաքում պարարտանյութերի գործարանում պայթյունի պատճառը, որին զոհ էր գնացել 14 մարդ, կարող էր լինել ամիակի սելիտրայի պահեստում ծագած հրդեհը՝ հաղորդում է ITAR-TASS-ը՝ հղում կատարելով տեղի ԶԼՄ-ներին:
Ինչպես հայտարարել է Տեխասի հրշեջ ծառայության մամլո քարտուղար Ռեյչել Մորենոն, ամիակի սելիտրան պահեստում պահվել է այլ վտանգավոր քիմիկատների հետ, որոնք անհրաժեշտ են պարարտանյութերի արտադրման համար:
«Այդ շինությունում հրդեհն, ամենայն հավանականությամբ, դարձել է արտակարգ պատահարի պատճառ: Համենայնդեպս, դեռ ամեն ինչ դա է մատնանշում»,- ասել է Մորենոն:
Ապրիլի 17-ին պայթյունը տեղի էր ունեցել հենց այն պահին, երբ հրշեջները մարում էին տվյալ գործարանում հրդեհը: Պայթյունի ալիքը ոչնչացրել էր ավելի քան 140 հարևան շինություններ, այդ թվում՝ դպրոցը, ծերանոցն ու բազմահարկ բնակելի շինություն:
