Ինդոնեզիայի ազգային ոստիկանությունը հայտնել է Ջակարտայում ահաբեկչությունները կազմակերպած ահաբեկիչների ազգությունները: Այս մասին հայտնում է The Jakarta Post-ը:
Ջակարտայի ոստիկանապեստ գեներալ Տիտո Կառնավիանի խոսքով՝ նրանք բոլորը ինդոնեզացիներ են եղել: Դեռ հայտնի չէ՝ արդյոք ահաբեկիչներից մեկին հաջողվե՞լ է փախչել իրավապահներից:
Կառնավիանը նաև մանրամասներ է հայտնել ահաբեկչությունների ենթադրյալ կազմակերպչի՝ իսլամիստ Մուհամմեդ Բահրուն Նաիմի մասին: «Ժամանակին նա կազմակերպել է «Քաթիբա Նուսանթարա» արմատական խումբը,- պարզաբանել է գեներալը:- Հիմա նա փորձում է դառնալ ԴԱԻՇ-ի բաժնի ղեկավար Հարավարևելյան Ասիայում: Այդ պաշտոնին միայն նա չի հավակնում»: Ըստ Կառնավիանի՝ մայրաքաղաքում ահաբեկչությունները Նաիմը կազմակերպել է՝ ԴԱԻՇ-ի ղեկավարությանն իր օգտակարությունը ցույց տալու համար: Ինդոնեզիայի հատուկ ծառայությունների տեղեկությամբ՝ ներկայումս իսլամիստը սիրիական Ռաքքայում է:
Բահրուն Նաիմն արդեն բազմիցս հայտնվել է Ինդոնեզիայի իրավապահ մարմինների ուշադրության կենտրոնում: 2010 թ. նոյեմբերին նա ձերբակալվել է հակաահաբեկչական հատուկ նշանակության ջոկատի կողմից և դատապարտվել 2,5 տարվա ազատազրկման ապօրինաբար զենք պահելու համար: Ազատ արձակվելով՝ Նաիմը մեկնել է Սիրիա և անդամագրվել ԴԱԻՇ-ին:
Հունվարի 14-ի առավոտյան Ջակարտայում 6 պայթյուն է տեղի ունեցել: Դրանից հետո փոխհրաձգություն է սկսվել ոստիկանների և գրոհայինների միջև: Զոհվել է 10 մարդ:
