«Ապրանք–փող–ապրանք». «Առաջին լրատվական»-ի հետ զրույցում այսպես բնորոշեց Երևանի ավագանու ընտրությունները քաղաքագետների միության նախագահ Հմայակ Հովհաննիսյանը, ով հավելեց, որ ընտրակաշառքը ևս մեկ անգամ դարձավ հիմնական գործիքը և որոշողը։ «Այդպես էլ պետք է լիներ, որովհետև հասարակությունը մոտիվացիա չուներ: Այսինքն՝ քանի որ ընդդիմությունը միանական ցուցակով չկարողացավ հանդես գալ և ըստ էության չկարողացավ բողոքավոր քվեարկություն կազմակերպել, ուրմեն այս արդյունքը միանգամայն բխում է ընդդիմության ձախողումից և միասնաբար հանդես գալու հնարավորության ձախողումից»,- ասաց նա:
Մեր այն հարցին, թե «Բարգավաճ Հայաստանը» նախկինում հայտարարել էր, որ եթե ընտրությունները կեղծվեն, ապա իրենք մանդատները չեն վերցնի, ի՞նչ կարող է նշանակել այն, որ մի կողմից՝ դժգոհություն կա ընտրությունների արդյունքների վերաբերյալ, մյուս կողմից՝ ԲՀԿ-ն վերցնի մանդատները, Հ. Հովհաննիսյանը պատասխանեց. «Ի՞նչ է նշանակում չվերցնել մանդատները։ Նույնիսկ ՀԱԿ-ը, որն ըստ էության, նախորդ անգամ բոյկոտեց ավագանու աշխատանքը և չվերցրեց մանդատները խոստանում էր, որ այդպես չի վարվի: «Բարգավաճ Հայաստանի» դեպքում էլ էապես կնվազեն նրա հնարավորությունները մյուս ավագանու ընտրություններին: Մարդիկ ակնկալում են, որ իրրենց շահերը կպաշպանվեն, որովհետև այն ընտրողը, որը ձայն է տվել՝ թեկուզ դրամական պարգևատրության դիմաց, միևնույն է, բացի այդ դրամական պարգևատրությունը, ակնկալում է նաև այն, որ այդ չորս տարիների կտրվածքով իր շահերը կպաշտպանեն»:
Հարցին, թե նույնիսկ ընտրությունների այսօրինակ արդյունքների դեպքում, հնարավո՞ր է երկրում իրավիճակ փոխվի, քաղաքագետը պատասխանեց. «Դա դժվար հարց է և կախված է մեկ մարդուց, ով զբաղեցնում է երկրի նախագահի պաշտոնը»:
Մեր զրուցակիցի դիտարկմամբ՝ ընտրությունների այս արդյունքը միանգամայն կանխատեսելի էր, սակայն ըստ նրա, ընդդիմությունը և «Բարգավաճ Հայաստանը» շատ մեծ սխալ թույլ տվեցին՝ նախ չմիավորվելով, ապա քարոզարշավի ընթացքում հնչեցրած արտահայտություններով, իսկ «Բարև Երևան» դաշինքն իր հերթին չկարողացավ հասարակությանը համոզել, որ իր ներկայացրած ցուցակը կարող է հաղթող լինել:
