ՄԱԿ-ի գլխավոր քարտուղար Պան Գի Մունը խորը մտահոգություն է հայտնել Սիրիային հասցված իսրայելական օդուժի հարվածների մասին տեղեկությունների առնչությամբ: Ընդգծելով, որ ներկայում ՄԱԿ-ը չի տիրապետում միջադեպի մանրամասներին և չի կարող հաստատել կատարվածը, նա տարածաշրջանում բոլոր հետաքրքրված կողմերին կոչ է արել զսպվածություն դրսևորել և հարգել պետության ինքնիշխանության սկզբունքը: Այս մասին հայտնում է ITAR-TASS-ը:
«Գլխավոր քարտուղարը բոլոր կողմերին կոչ է անում դրսևորել առավելագույն հանգստություն և զսպվածություն, ինչպես նաև գործել պատասխանատու կերպով՝ կանխելու առանց այդ էլ կործանարար և ծայրաստիճան վտանգավոր հակամարտության սրումը»,- նշվում է ՄԱԿ-ի գլխավոր քարտուղարի պաշտոնական ներկայացուցիչ Մարտին Նեսիրկեի տարածած հայտարարության մեջ:
Արաբական ԶԼՄ-ների տվյալներով՝ Սիրիան այդ մասին արդեն ծանուցել է ՄԱԿ ԱԽ-ին: Սակայն ինչպես հայտնել է համաշխարհային կազմակերպության կենտրոնակայանի աղբյուրը, այդ հարցով խորհրդի գումարման մասին որոշում դեռևս չի ընդունվել:
