Ֆրանսահայ կազմակերպությունները համակարգող խորհուրդը (CCAF) հունվարի 12-ին հաղորդագություն-նամակով ահազանգ է հնչեցնում Եվրոպայի խորհրդի կողմից առաջիկա օրերին Արցախի մասին ադրբեջանամետ մի բանաձևի քվեարկության հավանականության առթիվ:
Ըստ CCAF-ի՝ եվրոպական այդ կառույցը թուրքական և ադրբեջանական լոբիի հզոր ազդեցության տակ է և, մարդու իրավունքները անտեսելով, նախընտրում է նավթի և աշխարհառազմավարական շահերը:
Այս առթիվ CCAF-ի համանախագահներ Արա Թորանյանը և Մուրադ Փափազյանը նամակ են պատրաստել՝ ուղղված եվրոպացի բոլոր պատգամավորներին:
Նամակում ասվում է, որ Եվրախորհրդի Խորհրդարանական վեհաժողովի (ԵԽԽՎ) հունվարի 26-ի նիստի օրակարգում ընդգրկված է բրիտանացի պատգամավոր Ռոբերտ Ուոլթերի՝ բացահայտորեն կողմնակալ բանաձևի քննարկումը, որը վերաբերում է Լեռնային Ղարաբաղի իրավիճակին: Նշվում է, թե հավանական է, որ քվեարկությամբ ընդունվի այդ բանաձևը, ինչը ավելի մեծ ազդեցության հնարավորություն կընձեռի Անկարային և Բաքվին՝ իրենց ուղեգծում գտնվող այդ շրջանում, դրա ուղղակի և անուղղակի բոլոր հետևանքներով հանդերձ: Եվ եթե այդ բանաձևն ընդունվի, ըստ CCAF-ի՝ մի կողմից լրջորեն կչեզոքանան հակամարտության լուծման բոլոր հնարավորությունները և, մյուս կողմից, լուրջ հարցականի տակ կընկնի եվրոպական այս կառույցի անաչառությունը, որի պարտականությունն է պաշտպանել և տարածել ժողովրդավարական արժեքները:
Ապա, մարդու իրավունքների ոտնահարման և շրջանում խաղաղությանը սպառնացող Ադրբեջանի և Թուրքիայի քաղաքականության տարբեր արտահայտությունների թվարկումից հետո, ասվում է, որ այս ամենը, բնականաբար, չկան Ուոլթերի բանաձևում, որը զլացել է գոնե մեկ անգամ հիշատակել «ինքնավարության իրավունքը»:
CCAF-ի համանախագահները եվրոպացի պատգամավորներին հիշեցնում են նաև, որ Ուոլթերը Մեծ Բրիտանիայի խորհրդարանում Ադրբեջանի հետ բարեկամության խմբի անդամ է եղել, նաև Անկարայի կողմից անցյալ մայիսին նրան շնորհվել է Թուրքիայի քաղաքացիություն:
Նամակի վերջում կոչ է արվում Եվրախորհրդի բոլոր պատգամավորներին, որ զերծ մնան նման մի խաղից, որը որքան գռեհիկ, նույնքան էլ անբարո է:
