Վաղ առավոտից լարված իրավիճակ է Մալաթիա-Սեբաստիա վարչական շրջանի թիվ 179 դպրոցում տեղակայված երկու՝ թիվ 8/08 եւ 8/09 ընտրատեղամասերում։
Թիվ 8/08-ի ընտրատեղամասային ընտրական հանձնաժողովի ԲԿՀ-ական նախագահը ոստիկանությանը խնդրել է ուժեղացված հսկողություն իրականացնել՝ միջադեպերը կանխելու եւ լարվածությունը թուլացնելու համար։
Այս տեղամասում են աշխատում «Քաղաքացի Դիտորդ» նախաձեռնության դիտորդները, ովքեր բարձրաձայնում են տարբեր տեսակի ընտրախախտումների մասին, պնդում են, որ այստեղ ընտրողներին ուղղորդում են, խոչընդոտում են իրենց աշխատանքը, փորձում են տեսախցիկները անջատել, խլել, սպառնում են եւ վիրավորում։ Դիտորդները նաեւ հայտարարում են, որ մի քանի ժամ շարունակ այստեղ են եղել իշխող Հայաստանի հանրապետական կուսակցության (ՀՀԿ) մի քանի վստահված անձինք, ինչն Ընտրական օրենքի խախտում է։
Թիվ 8/08-ում ՀՀԿ-ի վստահված անձը դիտորդների պնդումները «սուտ, հերյուրանք» են անվանում, պնդելով, որ նրանք նպատակադրված եկել են սադրանքներ իրականացնելու։ Նա պնդեց, որ այդպիսի մարդկանց պետք է տեղափոխել հոգեբուժարան։
«Ազատություն» ռադիոկայանի տեսախցիկը ընտրատեղամասում պաբերաբար կուտակումներ է արձանագրում, տեղամաս են գալիս շքեղ մեքենաներ, որոնք, դիտորդների վկայությամբ, ողջ օրը շրջել են այստեղ։ Տեղամասի մուտքի մոտ դիտորդները արդեն քվեարկած մարդկանց կուտակումներ են արձանագրում, սակայն ոստիկանները չեն արձագանքում։
Թիվ 8/08-ում «Բարգավաճ Հայաստան» կուսակցության վստահված անձը «Ազատություն» ռադիոկայանի հետ զրույցում հայտարարեց, որ արձանագրել է, թե ինչպես տարեց մի ընտրողի անհայտ անձը հորդորել է քվեարկել 6 համարի՝ ՀՀԿ-ի օգտին, եւ անմիջապես հեռացել։ «Բարգավաճ Հայաստան» կուսակցության (ԲՀԿ) վստահված անձը «խայտառակություն» էր որակում այս տեղամասում ստեղծված իրավիճակը:
