Երևանի Աջափնյակ վարչական շրջանի թիվ 6/05 ընտրատեղամասում առավոտից ընտրական գործընթացը սկսվել է կարգի համաձայն, սակայն մթնոլորտը հանձնաժողովի նախագահի և վստահված անձանցից ոմանց միջև բավականին լարված է:
Տեղամասում աշխատող Հանրապետական և Բարգավաճ Հայաստան կուսակցության վստահված անձինք փորձում էին ճնշել և նույնիսկ վիճաբանել ընտրատեղամասային հանձնաժողովի նախագահ Գիորգի Արիստակեսյանի հետ, ով նրանց թույլ չէր տալիս միջամտել քաղաքացիների քվեարկության գործընթացին քվեախցիկում:
Քվեախցիկում քվեարկելիս՝ Հանրապետական կուսակցության վստահված անձին դիմեց քաղաքացիներից մեկը, ով տեսողական խնդիրներ ուներ: Մինչ վստահված անձը մոտենում էր քաղաքացուն, Գիորգի Արիստակեսյանը մոտեցավ քաղաքացուն և վստահված անձին, սաստեց, որ այլևս նման բան չկրկնվի: Խիստ սաստելուց հետո վստահված անձը սկսեց աղմուկ բարձրացնել, բղավել հանձնաժողովի նախագահի վրա: Նույն միջադեպը կրկնվեց նաև Բարգավաճ Հայաստան կուսակցության վստահված անձի մասնակցությամբ, ով ասաց, որ թույլ չտալով տեսողական խնդիրներ ունեցող անձանց օգնել քվեախցիկում, նախագահն աշխատում է իրենց դեմ և իրենք ձայներ են կորցնում:
Այսպես հանձնաժողովում ՀՀԿ և ԲՀԿ վստահված անձինք միավորվել էին հանձնաժողովի նախագահի դեմ՝ նրան «ղրգած» որակելով: Սրան ի պատասխան Գիորգի Արիստակեսյանն ասաց, որ մինչև քաղաքացին անձամբ չդիմի իրեն, թե տեսողական խնդիրներ ունի և չի կարող տեսնել քվեաթերթիկը, ինքը կմտածի այդ ուղղությամբ, բայց թող վստահված անձինք քաղաքացու փոխարեն չորոշեն և չխոչընդոտեն ընտրական գործընթացը:
«Առաջին լրատվական»-ի հետ զրույցում 6/05 ընտրատեղամասյին հանձնաժողովի նախագահն ասաց, որ եթե այսպեսո շարունակվի, ինքը կդիմի ոստիկանությանը վստահված անձանց կարգի հրավիրելու պահանջով:
