Գրեթե ամեն երրորդ գերմանացին Քյոլնում դեպքերից հետո սկսել է խուսափել մարդկանց զանգվածային կուտակման վայրերից: Այս մասին վկայում են ARD հեռուստաընկերության՝ այսօր հրապարակված հարցման արդյունքները:
Հետազոտության արդյունքներով՝ հարցվածների մոտ 30%-ն ասել է, որ Քյոլնում կատրվածից հետո սկսել է խուսափել բազմությունից, որտեղ Ամանորի գիշերը կանայք ենթարկվել են հարձակումների, ենթադրաբար, միգրանտների կողմից: Ընդ որում՝ կանանց շրջանում այդ ցուցանիշն ավելի բարձր է՝ 37%:
Միաժամանակ, հարցվածների 60%-ը նշել է, որ չեն փոխել իրենց վարքը: Կանանց շրջանում այդպիսի պատասխան է տվել 49%-ը:
Հարցման մասնակիցների 82%-ը կողմ է արտահայտվել հասարակական վայրերում հսկող տեսախցիկերի ավելացմանը: 17%-ը նշել է, որ դա ավելորդ է համարում: Հարցմանը, որն անցկացվել է հունվարի 6-ին, մասնակցել է Գերմանիայի 500 քաղաքացի:
Հունվարի 1-ի գիշերը Քյոլնում կայարանի հրապարակում հավաքվել էին «արաբական կամ հյուսիսաֆրիկյան արտաքինով մոտ 1000 տղամարդ: Խմբեր կազմելով՝ նրանք հարձակվել են կանանց վրա, սպառնացել նրանց, թալանել, չափազանց ագրեսիվ ձևով հետապնդել: Ոստիկանությունում արդեն ավելի քան 120 հայտարարություն է ստացվել տուժածներից: Բացառված չէ, որ հանցագործների մեջ կարող էին փախստականներ լինել:
