ՀՀԿ-ն այսօր չեղյալ է համարել իր, այսպես կոչված, ամփոփիչ հանրահավաքը, որ պետք է տեղի ունենար Ազատության հրապարակում: Պաշտոնապես պատճառաբանել են, որ Տարոն Մարգարյանն, ըստ ժամանակացույցի, հինգ հանդիպումներ ունի վարչական շրջաններում, այդ իսկ պատճառով հանրահավաք անցկացնելը նպատակահարմար չեն գտել: Իրականում, իհարկե, պարզ է, որ այս պատճառաբանությունը մոգոնած է, որովհետև Տարոն Մարգարյանի նախընտրական ժամանակացույցը պետք է որ ավելի շուտ պարզ լիներ, և կարիք չկար Ազատության հրապարակում նախապես հանրահավաք պլանավորել:
Իրականում ՀՀԿ-ն, անկասկած, խուսափել է հրապարակային խայտառակությունից՝ բառիս բուն և պատկերավոր իմաստով: Եվ, իհարկե, ճիշտ էլ կողմնորոշվել են, հատկապես՝ ԲՀԿ-ի երեկվա հանրահավաքից հետո, որը հրապարակային խայտառակության ևս մի օրինակ էր, երբ ինքն իրեն կես միլիոնանոց հռչակող կուսակցությունը կարողանում է ընդամենը մի քանի հազար անչափահասների բերել այս ու այն մարզից՝ հանրահավաք անցկացնելու համար:
ՀՀԿ-ն ԲՀԿ-ին տեսնելուց հետո, բնականաբար, կայացրել է բավական խորամանկ որոշում և թողել է, որ ԲՀԿ-ն միայնակ խայտառակ լինի հրապարակում, քանի որ պարզ էր, որ առանց մարդկանց բերման ենթարկելու ՀՀԿ-ն չէր կարողանալու «ավելի լավ հանրահավաք» անցկացնել, քան ԲՀԿ-ինն էր: Էլ չասած այն մասին, որ Տարոն Մարգարյանը հազիվ բակային մի քանի խոսքի է ձգում, ուր մնաց ելույթ՝ Ազատության հրապարակում, որն, իհարկե, չէր կարող չլինել:
Ահա այս գործոնները հաշվի առնելով էլ՝ ՀՀԿ-ականներն, անկասկած, կայացրել են հանրահավաքից խուսափելու իրենց որոշումը: Սակայն դա հազիվ թե օգնի ՀՀԿ-ին: ՀՀԿ-ն իզուր է անհանգստանում խայտառակվելուց: Վերջիվերջո, այդ կուսակցությունն իր կառավարման այս տարիների ընթացքում այնքան է խայտառակվել, որ «ավելի խայտառակ» հնարավոր չէ պատկերացնել: Թեև, պետք չէ բացառել, որ հենց այս պատճառով էլ ՀՀԿ-ն հետաձգել է հանրահավաքը, այսինքն չեղյալ է համարել այն, որովհետև «ավելի խայտառակ» հնարավոր չէր, «ավելի խայտառակ», միևնույն է, չէր ստացվի: Իսկ ՀՀԿ-ն, ինչպես գիտենք, շատ հավակնոտ կուսակցություն է և միշտ ձգտում է ավելիին:
