Երևանի Կենտրոն և Նորք Մարաշ ընդհանուր իրավասության դատարանը՝ դատավոր Գագիկ Խանդանյանի նախագահությամբ քիչ առաջ Գևորգ Սաֆարյանի կալանավորելու մասին որոշում կայացրեց: forrights.am-ի փոխանցմամբ՝ ակտիվիստի շահերը ներկայացնող փաստաբան Տիգրան Հայրապետյանը դատարանի այս որոշումը ապօրինի է համարում:
Դատավոր Խանդանյանը կալանավորելու մասին որոշումը չի տրամադրել փաստաբանին, ինչը օրենքի պահանջն է, այլ տվել է քննիչին ու ասել՝ ում ուզում եք տվեք:
«Այսպիսով դատարանը ցույց տվեց, որ ինքը քննչական մարմնին կցված մի մարմին է ընդամենը», դատական նիստից հետո մեր հետ զրույցում կարծիք հայտնեց փաստաբան Տիգրան Հայրապետյանը:
Ըստ փաստաբանի քննիչը որևէ ապացույց չի ներկայացրել դատարանում՝ հիմնավորելու, որ Գևորգ Սաֆարյանն իրոք հարվածել է ոստիկանության ներկայացուցչին, ավելին, քննիչն անգամ չի ներկայացրել, որ Գեղամ Խաչատրյանը ոստիկանության ներկայացուցիչ է:
«Սա նշանակում է, որ դատավորը արտադատարանական կապի միջոցով է տեղեկացել, որ տուժող ճանաչված Գեղամ Խաչատրյանը ոստիկանության ներկայացուցիչ է, ինչ որ մեկը զանգել ասել է, քանի որ դատարանում այդպիսի ապացույց չի ներկայացվել »:
Որ հրեշտակապետ Գեղամ Խաչատրյանին հարվածել են, վկայել են երկու այլ հրեշտակներ՝ հրեշտակների գումարտակից, իսկ քննիչի ներկայացմամբ մի դեպքում Գեղամ Խաչատրյանն ասել է, որ խառնաշփոթ էր, չի տեսել ով է խփել, մյուս դեպքում՝ ասել է, որ Գևորգն է բռունցքով հարվածել դեմքին:
Փաստաբանի պնդմամբ, իրականում Գևորգն է հարվածներ ստացել՝ դեմքին և մարմնի տարբեր մասերին, ինչն արձանագրվել է դատաբժշկի կողմից:
