ԱԺ ՀՀԿ խմբակցության պատգամավոր, ԱԺ պետաիրավական հարցերի մշտական հանձնաժողովի նախագահ Դավիթ Հարությունյանն այսօր մասնակցում էր ՀՅԴ նախաձեռնած «Քվեն ուժ է» շարժման` ԸՕ նախագծի վերաբերյալ քննարկումներին: Եթե այս քննարկման մեկ այլ մասնակից` ԿԸՀ նախագահ Գարեգին Ազարյանը շատ արագ դուրս եկավ դահլիճից ու հեռացավ, Դավիթ Հարությունյանը միջոցառմանը մասնակցեց մինչև վերջ:
«Առաջին լրատվականը» հետաքրքրվեց, թե ինչո՞ւ է Հարությունյանը որոշել մասնակցել ՀՅԴ միջոցառմանը, արդյո՞ք ինքն էլ չի որոշել անդամագրվել շարժմանը: «Ինձ հետաքրքրում են ԸՕ վերաբերյալ բոլոր կարծիքները»,- մեկնաբանեց նա:
Դավիթ Հարությունյանը նաև տեղեկացրեց, որ ԸՕ վերաբերյալ ընդդիմության և հասարակական կազմակերպությունների ներկայացրած առաջարկների մի մասն իրեն հետաքրքրել է, և կփորձեն գտնել մեխանիզմներ: Իսկ մի մասին Հարությունյանը կտրուկ դեմ էր, և ասաց, որ պայքարելու է` դրանք չընդունվելու համար: Նրա համար կտրականապես անընդունելի առաջարկներից մեկն, օրինակ, երկքաղաքացիներին ընտրվելու իրավունք տալն է:
