Շղարշիկ գյուղի բնակիչ Մուշեղը գյուղի վարպետ մորթ անողներից է: Գառնուկին գետնին տապալելով՝ շտապում է մորթել ու կախել ծառից: Ամանորին են պատրաստվում: Ասում է, որ իրենց մոտ «ադաթ» է՝ Նոր տարվա սեղանին պարտադիր պետք է թարմ միս լինի: Գառան խաշլաման պարտադիր է:
«Բա մեր քրտինքն է: Մեր հալալ քրտինքով սաղ տարի աշխատում ենք, պահում ենք, որ էս օրերին էլ մորթենք, ուտենք, ուրախանանք»,- մեզ հետ զրույցում ասում է Մուշեղը:
Նա արտագնա աշխատանքի է մեկնել Ռուսաստանի Դաշնություն և 8 տարուց ավելի աշխատել այնտեղ, բայց վերջին տարիներին արդեն նախընտրում է մնալ հայրենի գյուղում, ընտանիքի կողքին, անասուն պահել ու թեկուզ քիչ վաստակել, բայց մնալ հարազատ հողում:
Մուշեղը չի հերքում, որ դժվար է գյուղում ապրելը, բայց և հպարտանում է իր ծագմամբ, մեծ ընտանիքով ու սասունցու արմատներով:
