Ամերիկացի գիտնականների վկայությամբ՝ Ամերիկայում 1609-1610թթ. ձմռանը առաջին անգլիացի նորաբնակները մարդու միս են կերել:
Այս մասին հիշատակությունն ավելի վաղ հանդիպել է գրավոր աղբյուրներում, սակայն առաջին անգամ են ստացվել գիտական ապացույցներ՝ հաղորդում է BBC-ն:
Վաշինգտոնի Բնական պատմության ազգային թանգարանի հետազոտողները անալիզի են ենթարկել 14-ամյա աղջկա մարմնի մնացորդները. այն հայտնաբերվել էր անցած տարի՝ Ջեյմս նավահանգստում կատարված պեղումների ժամանակ (ավելի ուշ՝ Ջեյմսթաուն քաղաք, Վիրջինիա նահանգ): Նավահանգիստը 1607թ. հիմնադրվել էր անգլիացիների կողմից:
Հայտնաբերված մնացորդները շուրջ 400 տարեկան են: Գանգուղեղի ու մեծ ոլոքի վրա հայտնաբերվել էին հարվածների ու նշանների հետքեր:
«Կան միանգամայն հստակ ապացույցներ, որ մարմինը անդամահատվել է, իսկ միսը առանձնացվել ոսկորներից»,- հայտարարել է մարդաբան Դագ Օուսլին:
Անհայտ է, թե ինչպես է մահացել աղջիկը, սակայն մարդաբանները պնդում են, որ նրա մարմինն անդամահատվել է մահից անմիջապես հետո:
Հաստատվել է, որ աղջիկը եղել է անգլիացի նորաբնակներից: Գիտնականները նշում են, որ դատելով ամեն ինչից՝ նա եղել է մարդակերների ոչ միակ զոհը:
Այսպես կոչված՝ «Սովի տարիները» Ամերիկայի գաղութացման պատմության ամենաողբերգական շրջաններից են:
1609-1610թթ. ձմեռը Ջեյմս նավահանգիստը պաշարվել էր հնդկացիական ցեղերի կողմից: Սնունդը վերջանալուց հետո գաղութարարները կերել էին նախ ձիերին, ապա շներին ու կատուներին, այնուհետև մկներին ու օձերին:
Նավահանգստի ու քաղաքի պաշարումը շարունակվել էր գրեթե կես տարի:
Ջեյմսի 300 բնակիչներից դաժան ձմեռը կարողացավ հաղթահարել միայն 60 մարդ:
