Ապրիլի 30-ին կյանքի 92-րդ տարում մահացել է օսկարակիր դերասանուհի Դինա Դուրբինը: Այս մասին, ինչպես տեղեկացնում է lifenews.ru-ն, հայտնել են 1940-ականների աստղի հարազատները։
«Սրտի կսկիծով ես ստիպված եմ ասել, որ իմ մայրը ու մեր բոլորիս սիրելի դերասանուհին լքել է մեզ»,- հայտնել է դերասանուհու որդին՝ Պիտեր Դևիդը:
Վերջին մի քանի տարում նա մամուլի հետ չէր շփվում ու միայնակ կյանք էր վարում:
Դինա Դուրբինին առաջին հաջողությունը եկավ «Ամեն կիրակի» մյուզիքլում նկարահանվելուց հետո: Սակայն ստուդիայի ղեկավարությունը չցանկացավ երկարացնել պայմանագիրն աստղի հետ, ու նա տեղափոխվեց նկարահանվելու Universal Pictures կինոստուդիա:
Դինա Դուրբինը հանդիսատեսին գրավել է Մեծ դեպրեսիայի ժամանակ, ինչպես նաև Universal Pictures-ին փրկել է սնանկացումից:
1938 թ. նա «Օսկարի» է արժանացել, ինչից հետո նրա անունը հավերժացել է Հոլիվուդի Փառքի ծառուղում:
1940 թ. Դինա Դուրբինն արդեն ԱՄՆ ամենաբարձր վարձատրվող դերասանուհին էր, ով ստանում էր 400 հազար դոլար հոնորար: