Մյունխենի «Բավարիա»-ի գլխավոր մարզիչ Յուպ Հայնկեսը հայտնել է Չեմպիոնների Լիգայի գավաթի խաղարկության կիսաեզրափակիչի »Բարսելոնա»-ի դեմ խաղից իր ակնկալիքների մասին:
«Պետք է ասեմ, որ «Բարսելոնա»-ն շարունակում է աշխարհի լավագույն թիմը լինել, և մենք համապատասխանաբար ենք պատրաստվում առաջիկա հանդիպմանը: Կատալոնացիները կարող են հրաշքներ գործել «Կամպ Նոու»-ում: Մենք պատրաստվում ենք հարձակվողական ոճի ֆուտբոլ ցուցադրել: Տեսնենք, թե ինչ կստացվի:
Ես լավատես եմ: Երբեք չեմ մտածում իրադարձությունների անհաջող զարգացման մասին: Հավատում եմ սաներիս: Գիտեմ, որ նրանք եզրափակիչ անցնելու մեծ ձգտում ունեն և ջանք չեն խնայի նպատակին հասնելու համար: Ցանկանում ենք ապացուցել, որ այն, ինչ եղավ Մյունխենում, պատահականություն չէր:
«Բարսելոնա»-ն բարձրակարգ ֆուտբոլ է ցուցադրում արդեն երկար տարիներ: Կատալոնական ակումբի կազմում խաղում է Լիոնել Մեսսին: Թիմն այժմ նոր գլխավոր մարզիչ ունի: »Բարսա»-ն ֆանտաստիկ ակումբ է: Սակայն մենք էլ չենք զիջում: Այնպես որ, վստահ եմ, որ «Կամպ Նոու»-ում մեզ բարդ ու դիտարժան խաղ է սպասվում»,- ՈւԵՖԱ-ի պաշտոնական կայքը մեջբերում է Հայնկեսի խոսքը:
