Ելիսեյան պալատը, որտեղ գտնվում է Ֆրանսիայի նախագահի նստավայրը, վաճառքի կհանի գինու իր հավաքածուների մի մասը: Այս մասին հաղորդել է Drouot աճուրդային տունը:
Փարիզում մայիսի 30-ին և 31-ին կներկայացվեն 1.2 հզ. շիշ գինիներ, որոնք ընտրվել են Ելիսեյան պալատի գլխավոր մատռվակ Վիրժին Ռուտիի կողմից: Այդ գինիները տարբեր ժամանակներում մատուցվել են երկրի ղեկավարներին: Վաճառքի վերաբերյալ որոշումը կայացվել է տնտեսական ճգնաժամի պատճառով: Վաճառված գինիների փոխարեն ձեռք կբերվեն ավելի համեստները, իսկ մնացած միջոցները կմտնեն պետբյուջե:
Ամենաէժան գինին արժե 15 եվրո, իսկ ամենաթանկը՝ 2.2 հզ եվրո: Նախատեսվում է, որ շատ գինիներ հասանելի կլինեն 100 եվրոյից ոչ ավել գնով: